VATRA: Viti 2006, viti i mbarësisë për gjithë popullin shqiptar

Southern Blvd - Bronx, NY: Federata PanShqiptare e Amerikës - VATRA në një urim tradicional për vitin e ri 2006 - shpreh urimet më të ngrohta duke i uruar Kryeminsitrit të gëzoi shëndet e gjithë të mirat familjerisht. Qoftë ky vit i mbarësisë për ju dhe gjithë popullin shqiptar, theksohet në urimin e Vatranve ku i jepet edhe mbështja e plotë Kryeministrit Berisha në luftën antikorrupsion dhe në thellimin e reformave të domosdoshme që kërkon vendi ynë, për t'u afruar në rrugën e integrimit me strukturat euroatlantike dhe në demokratizmin e vërtet të Shqipërisë. Kryetari i Federatës PanShqiptare të Amerikës - VATRA, inxh. Agim Karagjozi, uron Kryeministrin Berishën dhe Qeverinë e tij për shërbimin shpëtimtar që po i bëjnë Shqipërisë.

Kryeministrit të Shqipërisë, z. Sali Berisha, në këtë mesazh urimi i shkruhet:

Inderuari zoti Kryeministër !

Në këtë ditë të parë të vitit të ri 2006, në emër të anëtarëve të Federatës PanShqiptare të Amerikës VATRA, kam kënaqësinë t'ju shpreh urimet tona të ngrohta të gëzoni shëndet e gjithë të mirat familjerisht. Qoftë ky vit i mbarësisë për ju dhe gjithë popullin shqiptar !
Kjo ditë ne na gjen me plot besim se Shqipëria tashmë ka hyrë në rrugën e shumëpritur të kthimit në një shtet normal, të distancimit nga gjendja e mjerueshme ku ajo lëngoi për tetë vjet nën thundrrën e politikanëve të korruptuar, të xhveshur nga ndjenjat kombëtare e njërëzore dhe nga përgjegjëshmëria ndaj detyrës.

Hapat efektive të marra në zbatimin e programit gjithë përfshirës të Qeverisë së re demokratike nën kryesinë tuej na kanë ngjallur entuziasëm të jashtëzakonëshëm. Ne jemi të bindur se një diell i ri po lëshon rreze drite në atdheun tonë të shumë vujatur dhe po ndriçon horizontin shqiptar. Me mirënjohje ju përgëzojmë juve dhe ministrat tuaj në Qeveri për shërbimin shpëtimtar që po i bëni Shqipërisë. Zoti qoftë me Ju !
Me nderime Inxh. Agim Karagjozi, Kryetar i VATRËS

Prof. Dr Zekeria Cana, historian dhe aktivist i të drejtave të njeriut nga Kosova, patriot e atdhetar i shquar, i cili para vitit të ri zhvilloi një vizitë të paharruar në bashkësinë shqiptare në Shtetet e Bashkuara të Amerikës si mysafirë i nderuar i Vatrës, ka dërguar një letër mirënjohje ku shkruahet se:

FEDERATA PANSHQIPTARE E AMERIKËS VATRA
U largova nga shtëpia e Vatrës zulmëmadhe si ajo foshnja që e shkëpusin me rrëmbim nga gjiri i nënës pa thithur mirë qumështin. Kisha fatin dhe nderin e madh që në atë tempull të historisë dhe kulturës sonë kombëtare, të cilin e ëndërroja aq shumë si noramilist, të kaloja dy javë duke bërë gjumin, pushimin dhe leximin pranë portretit të Skëndërbeut, Nolit, dhe Konicës, librave të shumta, gazetave dhe arkivit.

Kryevatranët shpirtëndritur më shfaqeshin shpesh në ëndërr; Noli me fjalët e ëmbëla buzëmjaltë, Konica me shikimin e mprehtë të shqiponjës. Dëgjoja në gjumë me një frymë rrëfimin e gjatë të kolosve tanë për lindjen dhe rritjen e Federatës PanShqiptare të Amerikës VATRA, ngulmimin e saj për të qënë strumbullare e çështjes kombëtare, pikësynimin e "Diellit" për të ngrohur zemrat e shqiptarisë.

Ky mësim i udhëkryqeve historike mbyllej me amanetin e mëndjendruturve tanë që VATRA të ruhet si sytë e ballit, të mbahet gjithënjë në këmbë si zonjë e rëndë të forcohet e lartësohet. Unë do të shtoja se ajo është kopësht sa i moçëm, aq i bukur, që lypset të hijeshohet ende më shumë me fidanet e reja. Ky mision historik është në dorën e të gjithëve atyre që e kanë VATRËN për zemër, sikur që unë e kam me borxh t'i përkushtohem sistemimit të biblotekës dhe arkivit të saj margaritar.

Ndarja me ju në aeroportin ndërkombëtar të Nju Jorkut"John F. Kennedy International Airport", prej nga Dr. Gjon Buçaj, Sejdi Hysenaj dhe Agim Rexhaj ishte për një çast e prekshme, gjasonte me lamtumirën e fundit, por buzëqeshja e tyre ma treti ligështimin shqipërtëror. Zbrita në aeroportin e Prishtinës - Kosovë, më i fortë, me vullnet më të madh pune e jete - falë jush, që më pritët krahëhapur me zëmer e dëlirë dhe të ngrohtë të Vatrës sonë shqiptare. Më dhatë ushqimin më të ëmbël të shpirtit që është dashuria vëllazërore. Si t'ua shpërblej ? Qofshi gjithmonë faqebardhë! U pafshim me të mira dhe me gëzime!
Vëllazërisht Zekeria Cana
Prishtinë, 13 XII, 2005

Kështu Shoqëria më e vjetër e diasporës Federata Panshqiptare e Amerikës "Vatra" me Kryetar pasardhësin e Konicës, Nolit, Pecit, e të tjerëve... inxhinier Agim Karagjozin, merr me këtë mesazh mirënjohje nga Prof. Dr. Zekeria Cana historian dhe aktivist i të drejtave të njeriut nga Kosova, patriot e atdhetar i shquar, vleresimet, respektin dhe nderimet më të larta, për veprën e rolin e saj historik në dobi të çështjes kombëtare.