Doli numri i ri i revistes "Jeta Katolike" New York, 4/2006

“Jeta Katolike”, botohet prej 40 vitësh, nën kujdesin e Kishës Katolike “Zoja e Shkodrës” në New York. Ajo, ruan shembullin e traditës më të mirë në fushën e publicistikës shqiptare, duke pasur si fill orientues trinomin Fe-Atdhe-Përparim.
Përmbajtja e numërit të ri, fillon me shkrimin “Koha e të Ardhurit” (Avdenti), shkruar nga drejtori i revistës Don Pjetër Popaj. Shkrimi i kushtohet afrimit të ditës së bardhë të Krishtlindjes. Aktivitetet kushtuar 400 – vjetorit të lindjes së leksikografit të parë shqiptar nga Zadrima Ipeshkëvit të Sapës Imzot Frang Bardhit, zë një vend të dukshëm në numërin e ri, që doli në prag të Krishlindjeve.

Atmosferën e organizimit nga Qendra “Nënë Tereza”, pranë Kishës Katolike “Zoja e Shkodrës”, për përkujtimin e figurës së Imzot Frang Bardhit e sjellë në faqet e revistës editori i saj Mark K. Shkreli, i cili, e shoqëron raportin e tij me foto origjinale nga tubimi i mbajtur në New York.

“Pak ditë në errësirë”, është filmi dokumentar më i ri, që i është përkushtuar jetës dhe veprës së Imzot Frang Bardhit, xhirimet e së cilës janë bërë në “Propaganda Fide” (Ungjillizimi i Popujve, sikurse njihet sot) në Romë, më pas në Venedik, duke pasur edhe përsonazhe që luhen nga aktor shqiptar. Një vend të rëndësishëm në revistë, zë reportazhi i përurimit të përmendores kushtuar Heroit Nacional të popullit shqiptar Gjergj Gjon Kastrioti në qytetin e Detroitit (Michigan), shkruar nga korrespondenti, shkrimtari Ndue Hila.

Nën titullin: “Heroi Gjergj Kastrioti mbërriti në Amerikë”, autori përshkruan atmosferën festive e gëzimin e papërshkruar, që ndjejnë shqiptaro - amerikanët, duke qenë krenar, se një pjesë e historisë lartësohet lavdishëm, përmes figurës së kryetrimit legjendar Gjergj Kastriotit, i cili për 25 vjet me radhë ka ndalur furinë e barbarëve turq mbi popullin shqiptar dhe Europën e qytetëruar.

Pjesëmarrja në ceremoninë e përurimit të përmendores të Presidentit të Shqipërisë Alfred Moisiu, Kardinalit të Detroit-it Eminenca e Tij Adam Maida, përfaqësuesve të qytetit të Rochester Hilles Detroit, organizimi i seminarit shkencor historik dhe pjesëmarrja e madhe e komunitetit shqiptaro – amerikan, tregoi se bijtë e Gjergj Kastriotit e duan dhe janë krenar për historinë e lavdishme të trojeve etnike shqiptare.

Editori Mark K. Shkreli, sjell sërisht në raportin e tij shërbimin ekumenik për Festën e Thanksgiving (Dita e Falënderimit), duke përshkruar takimin në Kishën “Zoja e Shkodrës” të përfaqësuesve të besimeve jo të krishterë dhe klerikët e tyre, të cilët, ishin të ftuar nga Dom Pjetër Popaj, për një shërbim ekumentik në Kishën Katolike të komunitetit shqiptar.

Një vend të rëndësishëm në revistën “Jeta Katolike”, sikurse edhe vitet e kaluara i është kushtuar Festivalit XVI Folklorik Shqiptar të organizuar nga Qendra “Nënë Tereza” dhe Kisha Katolike “Zoja e Shkodrës”, e cila, shoqërohet me fotoreportazh me ngjyra të këngëtarëve dhe vallëtarëve të veshur tërësisht me kostume tradicionale popullore nga të gjithë trojet etnike shqiptare. Reportazhi mbi Festivalin mbarëshqiptar të mbajtur në New York, është shkruar nga redaktori i gjuhës shqipe.

“Ruaje gjuhën se gjuha të ruan ty!”, është fjala e plotë përshëndetëse në Festival, që mbajti Dom Pjetër Popaj, duke i uruar mirëseardhjen spektatorëve në sofrën e begatë të muzikës e vallëve popullore shqiptare. Nga Detroiti një autobuz me 30 artistë të këngës e valleve popullore, kishte udhëtuar për 9 orë për të marrë pjesë në Ditën e Festivalit XVI Shqiptar të udhehequr nga Dom Anton Kçira, i cili, më pas do të jap një intervistë të posaçme për revistën “Jeta Katolike”, të realizuar nga gazetari Beqir Sina.

Dom Nikolin Pergjini në gjuhën angleze boton shkrimin “Christmas 2006”, duke ia lënë vendin po me të njëjtën tematikë gazetarit Ndue Bacaj, që sjellë sërisht atmosferën e Krishtlindjeve, perms përjetimeve mbresëlënëse: “Krishtlindja, evenimenti ku takohen njerëzorja me hyjnoren”. I riu Peter Saljanin paraqitet sërisht me një punim interesant të titulluar: “Merry Christmas… Ugh, I Mean Happy Holidays”.

Një ndër bashkëpunëtorët e hershëm dhe të përhershëm të shtypit katolik (kujtojmë “Buletinin Katolik Shqiptar”, qe doli në Sanint Clara Crus në California 1985-1995, shëinimi im K.K.), gazetari e studiuesi i mirënjohur Stephen Schwartz, përmes një analize historike sjell shkrimin “Albanian Catholic Victims of Serbian Imperialism”.

Editori i gazetës “Dielli” organ i Federatës Panshqiptare “VATRA” (1912) studiuesi e poeti Anton Çefa, përmes shkrimit analitik “Një vështrim kritik i letërsisë sonë”, sjell mbresat mbi veprën e shkrimtarit Imzot Zef Simoni Ipeshkëv, të titulluar: “Letërsia e pame ndryshe”, pjesë e Botimeve Françeskane Shkodër.

Abaz Veizi, paraqitet për lexuesit shqiptaro – amerikane, me një recension për librin: “Një dashuri e vrarë” të shkrimtarit Pierre - Pandeli Simsia me banim në New York. Në revistë, tashmë është bërë traditë paraqitja e sofrës poetike të autorëve nga tradita dhe atyre që punojnë e jetojnë në Amerike dhe Europë. Në këtë numër, do të lexoni poezi nga Filip Shiroka (1859-1935), Zyhdi Morava (poetët flenë nën dhe, kushtuar poetëve martir Vilson Blloshimi (1948-1977) dhe Genc Leka (1943-1977), pushkatuar nga rregjimi komunist në Shqipëri), Gjekë Marinaj (Texas), Luigj Çekaj (New York), Rudolf Marku (London), Esat Mekuli (1916-1993), Vitore Stefa Leka (Itali), Elinda Marku (Detroit), Zef Pergega (Detroit), Don Gjergj Simoni (Shkodër), Ndue Hila (Detroit), Gjergj Lacuku (Florida), Don Pren Kola (Prishtinë), Sonila Lika (Florida), Dhimitër Pojanaku (Tiranë), Gjeto Turmalaj (Conneticut), Dalan Luzaj (Chicago), Qazim Rrushaj (California) etj.

Në rubrikën profil studiuesi është botuar shkrimi: “Prof. Dr. Simon Pepa, albanolog i palodhur i letrave shqipe”, të cilat shoqërohen me disa poezi të marrë nga libri: “Brengë dhe gaz nga Shkodra ime”. Prof. Peter Prifti me banim në California, vjen kësaj rradhe në faqet e revistës me një studim të ri kushtuar: “The Jesuits in Albania” (A Century of Service to Christ and Country).

Apasionuesi pas perlave të natyrës së virgjër shqiptare të Alpeve të Veriut, Inxhinieri Zef Naçaj me banim në New York, për admiruesit e shumtë sjellë shkrimin “Përshkrime nga Kelmendi”, shoqëruar me fotot artistike, të realizuar nga ai vetë gjatë ekspeditave e udhetimeve si gjeograf në terren.
Prof. Dr. Agron F. Fico, paraqitet me shkrimin: “Frang Bardhi (1606-1643) - figurë e ndritur e dijës dhe kulturës shqiptare”, temë të cilën, ka preferuar sërisht edhe publicisti e editori i revistës “Trojet Tona” Tomë Paloka.

Rubrika “Letra në redaksi”, është e mbushur me urime, veretje e sugjerime të ardhur nga shtetet e ndryshme të botës, midis të cilëve veçojmë letrën e dërguar nga Shoqnia Shqiptare Katolike në Melbourne të Autralisë, dërguar posaçerisht revistes “Jeta Katolike” në New York. Më pas vijonë letrat e publicistit Paul Tedeschini nga Forli i Italisë, Fran Sokoli nga Belgjika, Dr. Namik Shehu, sekretar i Akademisë së Shkencave në New York, Merita B-McC East End of Long Island, NY, Renata nga Italia etj. etj.

Revista, është e hapur me të gjithë lexuesit, duke mirëpritur sugjerime, veretje dhe mendime. Ajo ka hapësirë për reklama dhe njoftime për njerëzit e interesuar për bisnesin e tyre. Bashkatdhetarët, mund të urojnë njeri-tjetrin, fëmijët të porsalindur, miq e të afërm, për raste festash fetare, krezmime, fejesa, martesa, ditëlindje, përvjetore, përkujtimore etj. Çiftet e reja, kanë një mundësi më shumë të fiksojnë çastet e bukura të martesës, përmes ngjyrave, duke u përshëndetur nga bashkëatdhetarë t dhe familjarët e tyre.

Afrohuni me mendimin dhe kontributin e drejtpërdrejtë në faqet e revistës tuaj!
Vetëm sëbashku mund të ruajmë, kultivojmë e mbrojmë më tej nga asimilimi vlerat më të mira të traditës shqiptare.

Ju kujtojmë:

Të gjithë lexuesve, brenda ShBA-së, që dëshirojnë të abonohen në revistën “Jeta Katolike”, shuma vjetore është $30.00 (USA) e jashtë ShBA-së $50.00. Të interesuarit, mund të dërgojnë pagesën në adresën: