Është faj të jesh antimysliman

Kanë plasur histeri gjoja filoperëndimore, që në fakt është një "velo" (vello, apo vel) komunizmi. Po vihen barazime idiote: mysliman = antievropian, prolindor, anti-i krishter. Po harrohet bashkëjetesa proverbiale shqiptare e të tri feve, për ta hedhur vendin në një ngatërresë fetare. Atë që bënë kundër feve komunistët në 1967-tën, po tentojnë ta bëjnë antikomunistët komunistë të sotëm, të shekullit të XXI-të.

Mbase duhet ta trajtojmë pikërisht ne këtë temë, ne që fatkeqësisht nuk besojmë se ka zot, por që kur plotësojmë formularët, poshtë rubrikës "besimi", vendosim "mysliman", apo "ortodoks", apo "katolik". Ne nuk jemi komunistë, jo, as Volteri e të tjerë ateistë, nuk kanë qenë komunistë. Të tillë si ne ka shumë në Shqipëri, ateistë, por që për pendesë, nuk e stampojmë zyrtarisht ateizmin tonë. Është një respekt që duhet t'u bëjmë feve ne shqiptarët, që u treguam aq popull i ulët, sa t'i prishim me dhunë objektet fetare (xhamia e kisha), të burgosnim klerikët, dhe të ndalojmë çdo rit fetar.

Me siguri do të reagojnë shumë lexues: "nuk e bënë shqiptarët luftën kundër fesë, por komunistët". Do t'u thonim se sëmundjet tona duhet t'i pranojmë, që të mund të shërohemi; pak shqiptarë mbetën pa i hequr së paku një tullë, xhamive dhe kishave tona, pra jemi bashkëfajtorë me komunistët, qoftë dhe që nuk iu kundërvumë atyre. Prandaj ne ateistët shqiptarë, të kohës së sotme, nuk duhet të kemi lirinë për t'u nënshkruar "ateistë", ne duhet të zgjedhim një fe për nënshkrim, si shenjë e pendimit tonë, që të mos përsërisim të njëjtën gjë, "1967-ën", as në forma të sofistikuar "panevropiane", siç po lexojmë këto ditë.

Ka plasur ky diskutim që "myslimanizmi është fe e keqe" dhe që "krishtërimi është fe e mirë"-dhe edhe anasjelltas-nga disa tipa që menduam se ish-komunizmin e tyre e kishin larë me vitet e burgut. Orët e mësimit të komunizmit që u bënin në burg, ato që i përshkruan aq bukur At Zef Pllumi, në librin "Rrno për me tregue", u kanë lënë një vel komunizmi edhe këtyre ish-të burgosurve politikë që po u kundërvihen feve, dikush myslimaneve, e dikush të krishterave. Si nuk skuqen, si nuk kanë turp që janë antimyslimanë, apo anti-të krishterë.

Islami, qenka fe antiperëndimore, qenka fe e keqe, e bile arrijnë t'u heqin të drejtën të jenë patriotë atyre që janë msylimanë, atyre që paskan "tradhtuar fenë e të parëve dhe fenë e të gjithë Ballkanit dhe Evropës, Krishterimin". Natyrisht, nuk ia vlenë t'u kujtosh këtyre as Skënderbeun, ndërruesin tonë të parë të fesë, nga i krishterë në mysliman, dhe as mijëra patriotë shqiptarë myslimanë (nga vëllezërit Frashëri etj.), sepse veli tyre komunist nuk i le të shkëlqejë arsyeja, logjika perëndimore. Kot që fshihen pas dy myslimanëve të mëdhenj shqiptarë, Kadaresë apo Qoses; asnjëri nga ata nuk është antimysliman, e as antikristian, përkundrazi.

Antimyslimanizmi me vel komunist, shkon edhe më larg, saqë edhe Kosovën rekomandon ta urrejmë sepse paska shumicën e banorëve myslimanë - as Enveri nuk ka pasur arritur deri këtu... Thuhej se në Shqipëri gjendet agjenturë pa para: e ku ka agjenturë serbomadhe më të mirë se kjo jona, ky veli komunist?!

Pastaj bëhen dhe përgjithësime: "Islami, ishte një regres i pashembullt". Nëse historinë nuk e kanë lexuar, këta artistët me vel, a kanë lexuar së paku romane, të përkthyer në shqip?! A e kanë lexuar "Çifuten e Toledos" të jomyslimanit Feuchtwanger, që të shohin se sa "regres" ishin në kohë të caktuara historike myslimanët, p.sh. kur takoheshin në Spanjë, dy kultuara të kohës, nga një anë universitarët, dhe nga ana tjetër analfabetët, ku në atë periudhë historike, këta të fundit ishin të krishterët! Kjo sa për t'i tundur pak këta injorantë të historisë, me vel pseudokultural. Ne jemi të bindur se edhe myslymanizmi, edhe krishtërimi, i kanë sjellur përparime civilizimit botëror!

E logjika zyrtare perëndimore është pa vel, e që nisë që lart, me presidentin amerikan Bush, që po lufton në botë kundër terrorizmit. Besoj se njerëzit tanë me vel komunist, do të akuzonin edhe amerikanët, italianët, gjermanët etj., për filomyslimanë, sepse shumë ushtarë të tyre që po japin jetën në mbrojtje të lirisë, janë myslimanë.

Liria e fesë, bën pjesë në të drejtat e njeriut, është një nga arritjet e civilizimit, që nuk mund ta thyej asnjë nga tanët me vel komunist. Natyrisht, ne po vëzhgohemi "me kujdes nga ndërkombëtarët, të cilët me këtë rast mbajnë edhe shënimet e duhura". E na "mbahet shënim" për të mirë, respektimi i ligjeve, i arritjeve botërore të lirisë; e na mbahet shënim për të keq çdo Bin Ladenizëm antimysliman.

A mos ka ardhur koha të ndalojmë me ligj propagandën antikombëtare, antimyslimane, antiortodokse dhe antikatolike?! Disa vite kishim ndaluar partitë komuniste e fashiste: bëmë atë që gjatë historisë kishin bërë shumë shtete demokratike, kur ekzistenca e tyre vihej në rrezik.