ZGJEDHJET DUHET TA BASHKOJNË EDHE MË SHUMË LDK–në E JO TA PËRÇAJNË

A po përçahet apo bashkohet LDK-ja në prag të zgjedhjeve që po e presin, a do të ndodhin njëmend reforma apo edhe më tutje do të mbesin vetëm dëshira të shtruara dhe të parealizuara, a po ashpërsohet fushata ende pa filluar në LDK shkaku i rreshtimit ndaj këtij apo atij kandidati që po ndodhin falë një kryesie aspak të dinjitetshme për LDK-në, kush do t’ mund të bëhet dhe a do të bëhet kryetar ai person që e do anëtarësia e LDK-së, pse është anashkaluar Këshilli i Përgjithshëm i LDK-së dhe, mbi të gjitha, si u bënë “trima” anëtarët e kryesisë së LDK-së pas vdekjes së presidentit Ibrahim Rugova dhe, për shumë pse-he të tjera, pyetjeve tona ju përgjigjet pa hezitime, Sabit Rrustemi, anëtar i Këshillit të Përgjithshëm të LDK-së.

“Kosova Sot”: A vazhdon të ketë përçarje ende në strukturat udhëheqëse të LDK-së?

Sabit Rrustemi: LDK si forca më e madhe politike në vend dhe që gati po i rrumbullakon dy dekada të ekzistimit të saj, gjendet para një sprove të re dhe tepër të rëndësishme në zhvillimin e saj, zgjedhjet e radhës brenda partisë, të cilat për herë të parë do të mbahen pa prijësin e saj shpirtëror, Dr. Ibrahim Rugovën, që, nënkupton edhe zgjedhjen e pasuesit të tij. Dhe, tash, në opinion, më shumë ka zgjuar interesimin zgjedhja e pasuesit se sa zgjedhjet e gjithmbarshme në nivelet e partisë. Ky interesim, për mendimin tim edhe i tejmasshëm nganjëherë, ndodh nga fakti i ndikimit të madh që kishte Rugova jo vetëm brenda strukturave të partisë dhe anëtarësisë qindramijëshe po, edhe në rrjedhat dhe proceset e gjithmbarshme kosovare.

Zgjedhja e pasuesit të Rugovës apo e kryetarit të ri të partisë, thënë më drejtë, ka lënë nën hije edhe postet tjera shumë të rëndësishme në LDK, nisur që nga të qenit delegat i Kuvendit, anëtar i Këshillit të Përgjithshëm, e, edhe anëtar i kryesisë, pa i anashkaluar fare edhe pozitat tjera, veçanërisht kryetarëve të degëve.

Tashti, vrapi për të siguruar përkrahje, qoftë për këtë grupacion të këtij apo atij kandidati, herë herë po keqkuptohet, keqinterpretohet deri edhe në përmasa naive, mos thënë banale, sa që po krijohet përshtypje se lufta për pozitën e të qenit i pari në parti nuk do të shpëtojë pa përçarje.

Të kuptohemi, ka garë, ka anime, ka tek - tuk edhe rreshtime pro apo kundër këtij kandidati, ani se asnjëri nga ta ende nuk është zyrtarizuar por, kandidatët e mundshëm gati të gjithë thuaja janë identifikuar. Prandaj, krejt kjo, më shumë i ngjanë një fushate brenda partiake se sa një përçarjeje të mundshme brenda një partie. Përçarja mund të ndodhë vetëm pas përfundimit zgjedhor brenda LDK-së.

Kjo fushatë paraprake për “kokrra” dhëntë zoti të kalojë pa plasaritje të mëdha. Po, të thuash se çdo gjë do të shkojë në rregull dhe në parimet e një demokracie të mirëfilltë, është paksa e pamendueshme mirë apo e thënë me një lehtësi të tepruar.

Do të ketë njerëz që do të ndahen të pakënaqur, të hidhëruar, të zhgënjyer, siç do të ketë edhe të tjerë që do t’ju plotësohen apetitet. Po, fillimisht lufta për pushtet në LDK do të zhvendoset në bazë. E, pastaj ai që e siguron bazën, ai do ta ketë të fituar edhe betejën. Prandaj, gjëmimet politike që shpërthejnë në Prishtinë, më shumë reflektohen apo shkaktojnë zhurmë periferive. Megjithatë, as “humbësit” e as “fituesit” e ardhshëm të zgjedhjeve në LDK, nuk do ta braktisin LDK-në.

Rezultati i zgjedhjeve e, me këtë edhe sa mund të jetë e përçarë apo e bashkuar LDK-ja, do të shihet tek në zgjedhjet e ardhshme lokale dhe parlamentare që e presin Kosovën në vitin 2007.

Po, kam besim se baza e partisë (aktivi dhe nëndega) kësaj radhe më shumë do ta peshojë dhe vlerësojë angazhimin e secilit. Tek pas këtyre vjen në radhë peshorja e degëve dhe e nivelit qendror, ku fushata brenda partiake merr një shkallëzim tjetër.

Rritja e frustuimeve të të gjitha grupacioneve në LDK do të ndodhë tek pasi të identifikohen delegatët e Kuvendit qendror. Nga përbërja e delegatëve, saktësisht do të dihet se cili do të jetë pasuesi i Rugovës dhe, në këtë nivel lufta për marrjen e kreut të LDK-së do të jetë më interesante. Një finale e pakompromis brenda skenës politike kosovare, ku LDK do të ketë rastin ta dëshmojë madhështinë po edhe zbrazësinë e saj.

Nëse ndodhë demonstrimi i madhështisë, meritat do t’ i takojnë anëtarësisë së gjerë e, jo kryesisë aktuale të partisë. Po, nëse ndodhë kjo e dyta, s’ do mend, merita është kryekëput e kësaj kryesie që ka momentalisht LDK-ja.

Zgjedhjet që do të fillojnë këtyre ditëve, duhet ta bashkojnë edhe më shumë LDK-në e jo ta përçajnë.

“Kosova Sot”: Si e vlerësoni punën e “Reformës”, të Naser Rugovës?

Sabit Rrustemi: Për mendimin tim, “Reforma” që tashmë po identifikohet me emrin e Naser Rugovës, është fraksioni i parë i legalizuar brenda LDK-së, ani se këtë iniciativë kryesia e LDK-së nuk e ka legjitimuar. Legjitimi i saj varet prej angazhimit dhe punës që kanë nisur ta bëjnë. Një analizë të kësaj “Reforme” unë kam pasur rastin ta lexoj përmes faqeve të internetit dhe, të them të drejtën është analiza e parë në këto 16 vite që bëhet nga anëtarët e LDK-së.

Kryesisë së LDK-së i ka takuar së paku t’ju shpreh një falënderim publik për punën që kanë bërë e, që realisht ata si kryesi e kanë pasur për obligim ta bëjnë vetë dhe t’ia prezantojnë anëtarësisë, sepse brenda kryesisë i kanë edhe sektorët tashmë e sa vite të fjetur të partisë por, as këtë nuk e kanë bërë.

Tashti, brenda raportit të prezantuar, unë edhe personalisht mund të gjej ndonjë shkarje apo të them ku ishin ata deri tash, po, po e përsëris, është raporti i parë i punuar dhe i bërë publik për punën e LDK-së dhe, që e ndihmon zhvillimin e mëtejmë të LDK-së.

Raporte të tilla për shembull, është dashur të prezantohen pas çdo palë zgjedhjeve që i ka fituar LDK-ja. E, nuk janë prezantuar sepse as nuk janë bërë, d.m.th, nuk janë shkruar. Unë për vete nuk i kam parë ani se ende e mbaj veten si anëtar i Këshillit të Përgjithshëm të LDK-së, ku realisht është dashur të prezantohen këto raporte.

Por, iniciativa e Naser Rugovës për reforma në LDK, nuk është e para iniciativë brenda LDK-së. Zaten, pikërisht për mungesë të reformave që u kërkuan e asnjëherë nuk ndodhën në LDK, shumë nga themeluesit por edhe një pjesë të mirë të intelektualëve që i kishim fillimisht në LDK, sot i kemi humbur.

Dhëntë zoti që këto reforma të ndodhin duke zbritur Naser Rugova me të tjerët që janë përkrahës të njëmendtë të reformave në LDK, në bazën e partisë e, jo duke ju drejtuar partisë vetëm përmes konferencave të shtypit apo duke ju shkruar diplomacive të huaja.

Reformat në LDK janë kuptuar dhe zhvilluar vetëm me ndërrimin e garniturave të ministrave apo kooptimit të anëtarëve në kryesinë qendrore e, tash së fundi edhe me ndryshimet e bëra në postet e larta shtetërore të Kosovës. Apo edhe me gllabërimin e sa më shumë posteve në emër të LDK-së.

Për t’i bërë reformat si duhet në LDK, duhet rikthyer edhe njëherë në qëndrimet që i pat marrë Këshilli i Përgjithshëm i LDK me 9 e 10 shtator 1999 për konsolidimin e partisë, për të cilat u pat ngarkuar mbi gjysma aktuale e kësaj kryesie dhe, që asnjëherë nuk i zbatoi deri në fund, madje as gjysmën e tyre.

“Kosova Sot”: Çfarë mendoni për akuzat që Naser Rugova, i ka bërë në adresë të anëtarëve të kryesisë dhe anëtarëve të LDK-së në përgjithësi?

Sabit Rrustemi: Atë raport të prezantuar edhe përmes faqes së internetit në “rugova.net”, nuk e shoh si akuzë. Në rend të parë e shoh si një përpjekje për të hapur një bashkëbisedë të njëmendtë brenda radhëve të LDK-së që nga hierarkia e saj. Por, hierarkia as nuk ka qenë e, as tashmë më së paku, është e interesuar për debat brenda LDK-së. Shembull më i freskët është mbledhja e fundit, pas një kohe tepër të gjatë e vetë Këshillit të Përgjithshëm, mbajtur me 8 Korrik 2006.

Kryesia e LDK-së qëllimisht shmangu debatin për zhvillimet në parti, sidomos pas vdekjes së Rugovës, nga frika se do të hedhet në votëbesim. Dhe, kjo u pa qartë, ani se askush thuaja nga anëtarët e Këshillit të Përgjithshëm (përjashto ndonjë individ) nuk kishte shkuar për ta rrëzuar kryesinë, sepse ishin në prag të shpalljes së zgjedhjeve në LDK. Por, ata e dëmtuan vetveten sepse nuk krijuan kushte për të biseduar mbi atë që e kanë bërë apo nuk e kanë bërë brenda këtyre viteve (8 vite në kryesi të partisë).

Debatin për punën e kryesisë, d.m.th. të vetë atyre, kinse po e lënë për Kuvend. Por kuvendi, dihet sa mund të debatojë dhe si do të debatojë për atë që nuk është bërë apo që është bërë. Fundja, sa ka rëndësi më debati pasi të jetë rrumbullakësuar gati një proces votues.

“Kosova Sot”: A po vazhdon ende që të “digjet” ndonjëri nga anëtarët e LDK-së, që pretendon postin e Kryetarit ?

Sabit Rrustemi: Ai që nuk di t’i ekspozohet diellit, përherë rrezikon djegien e një lëkure. Nganjëherë edhe më shumë. Mund edhe të rrjepet nga pak po, në fund, prej këmbëngulësisë e fiton ngjyrën e dëshiruar. Dikush tjetër që ende nuk po ekspozohet, po digjet prej hijes. E, kjo djegie s’ka ilaç. Madje edhe të koritë si edhe vetëdjegia.

Mëkatit të vetëdjegies, kandidati për postin e kryetarit të LDK-së, po i shmanget nga dëshira e të tjerëve për ta djegur. Thjeshtë nga pretendenti i cili ende nuk ka pasur kurajën ta thotë troç ambicien për të qenë i pari në parti, ani se po digjet nga kjo dëshirë si dhe e përkrahësve të tij, të cilët tash janë në kërkim edhe të kandidatëve tjerë të mundshëm sepse, ndihen më të pasigurt me zgjidhjet që tërthorazi ia servuan publikut. Edhe ata që fare pak merren me politikë nga ky soj i kandidatëve tinëzar po irritohen e, kuptoje sa mund të irritohen ata që 16 vite kanë vrapuar pa asnjë cent shpërblim për ta ndihmuar dhe ngritur më lartë LDK-në.

“Kosova Sot”: A mendoni se Nexhati Daci ende mbetet protagonisti kryesor për postin e Kryetarit të LDK-së?

Sabit Rrustemi: Akademik Nexhat Daci, së paku ka pasur kurajën ta thotë publikisht ambicien e vet si dhe qëllimet se pse dëshiron të jetë kryetar i LDK-së apo ta pasojë postin e Rugovës. Dhe, kjo është çmuar nga ata që i kanë së paku dy kokrra mend, pavarësisht a do t’ia japin a jo votën nëse do ta kenë rastin. Është diçka tjetër ta çmosh guximin e dikujt për t’u kandiduar për një post kaq të madh. E, diçka tjetër se a do ta votosh për hir të vetëm këtij guximi apo edhe të vetë vizionit që ofron.

Unë po ndeshem gati çdo ditë me anëtarësinë e LDK-së dhe ata nuk ngurrojnë, ma thonë troç: a po e bëni Dacin kryetar apo nuk na keni pas?

Nuk e përjashtoj mundësinë që edhe dikujt tjetër t’i thonë disi ngjashëm për prof. Fatmir Sejdiun apo edhe Lutfi Hazirin. Megjithëse Lutën, përmes një Letreje të panevojshme dhe me të drejtë të përfolur, kryesia aktuale e LDK-së në mënyrë shumë hileqare e ka paralajmëruar që të mos vrapojë shumë pas postit të kryetarit të LDK-së se do të jetë kryeministër i ardhshëm i Kosovës, kuptohet, me kusht që LDK t’i fitojë edhe zgjedhjet e ardhshme, për të cilën unë nuk do të dyshoja fare, nëse bëjmë zgjedhjen e duhur të kryetarit të partisë e, jo të një kryesuesi mbledhjesh sepse LDK ende nuk ka ra e, as që mund të bie në rangun e një komisioni. Po, Luta nuk ka pasur nevojë për këso lloj përkrahjesh apo edhe për disa përkrahës të tjerë, që ende janë adoleshentë në LDK.

Tashti, kryesia e LDK-së dhe disa miq të vjetër e të mirë që i kam brenda kësaj kryesie s’kanë arsye të më keqkuptojnë, po, nuk mund të dalin kështu publikisht kundër një njeriu apo një kuadri të cilit vetë ia kanë dhënë mandatin, jo një herë por, dy herë, pavarësisht në e kanë pëlqyer apo jo. Ata e kanë pranuar propozimin e dhënë prej vetë Rugovës edhe në kryesi e, pastaj e kanë votuar edhe në Kuvendin e Kosovës. Nuk kanë qenë të nderuar e as të thirrur as atëherë e, as tash që të “kallauzojnë” e shpifin nëpër zyrat e diplomacive të huaja në Prishtinë dhe sidomos nëpër drekat e darkat e shtruara me ta, kundër Dacit apo dikujt tjetër, sepse gati janë po të njëjtit që një shërbim të këtillë të pështirë e kanë bërë edhe ndaj vetë presidentit Rugova.

Logjikisht, nëse mund të jetë fajtor për shumëçka që apostrofohet nga ana e tyre akademik Nexhat Daci, përgjegjësisë nuk mund t’i shmangen as ata. Po, sa ishte gjallë Rugova, kundër Nexhat Dacit më shumë kanë pëshpëritur kuluareve e, jo nëpër forumet vendimmarrëse të partisë. A, unë e di që, rezerva ndaj akademik Dacit shumica e kësaj kryesie ka pasur edhe herën e parë e, edhe herën e dytë po, nuk kanë pasur guximin për t’ia refuzuar propozimin Presidentit Rugova, njësoj siç kanë pasur kundërshtime të fshehta edhe ndaj kabinetit qeveritar.

Shfrytëzuan rastin që, pakënaqësitë e tyre t’i shfaqin menjëherë pas vdekjes së Rugovës, duke i korrigjuar pjesërisht (sepse edhe këtyre iu desh që, shkaku i votave të bëjnë kalkulime brenda kryesisë) madje, pa i kaluar dhe miratuar këto propozime nëpër Këshillin e Përgjithshëm.

Falë këtyre kalkulimeve përfituan dy tre ministra, të cilët mbetën edhe më tutje në qeveri e, përfituan edhe disa të tjerë duke i dyfishuar e trefishuar postet në strukturat shtetërore, duke harruar krejt se LDK ka më shumë se një autobus kuadrosh.

Në kryesinë e LDK-së, me sa e di unë, vetëm prof. Hajzer Krasniqi ka mbetur edhe pa një post të dytë a të tretë. Krejt të tjerët, madje edhe disa të dëgjueshëm e servil jashtë kësaj kryesie, morën dy e më shumë poste, pa i llogaritur këtu edhe të qenit nëpër agjenci e borde të ndryshme në nivel Kosove.

LDK si parti e madhe dhe me një mal kuadrosh ka merituar një ndarje më të drejtë të posteve në të gjitha nivelet shtetërore të Kosovës e, para se gjithash, në nivelet e larta të qeverisë dhe agjencive të ndryshme qoftë në nivel ministrish apo edhe të vetë Kuvendit të Kosovës.

Tash, këta që janë zhytur nëpër shumë funksione e, kuptohet edhe në shumë burime financiare nga i njëjti buxhet i Kosovës, akuzojnë të tjerët për korrupsion, për vetkandidim apo edhe rreshtim këndej apo andej si dhe për ambicie normale të dikujt për karrierë politike e, edhe për kryetar partie.

Natyrisht, duke i parë këta përfitues pushteti në të cilin po vijnë përmes partisë dhe të qenit në krye të saj, secili anëtar me një bagazh politik në LDK dhe, me një potencial intelektual e atdhetar mund të joshet për të konkurruar në këtë garë, e cila, po dëshiroj që të jetë tipike demokratike dhe, në fund, të përfundojë ashtu si duhet dhe e meriton LDK-ja.

Personalisht jam ndër të rrallët që, publikisht e kanë shprehur dhe mbajtur një qëndrim kritik edhe ndaj akademik Nexhat Dacit sa ishte kryetar i Kuvendit të Kosovës, madje, edhe kur kritikuesit dhe anatemuesit e tashëm të tij e votëbesonin po në Kuvendin e Kosovës dhe ndjehem më i çlirë se nuk jam në taborin e tij po, as kundër tij, siç nuk jam as kundër të tjerëve që mendojnë ta zhvillojnë më tej LDK-në dhe, përmes saj edhe vetë Kosovën,

Intimisht kam dëshirë që akademik Nexhat Daci ta ketë një konkurrencë të denjë dhe të nivelit të tij në këtë garë e cila fatkeqësisht nuk ka paracaktuar ende kritere për kandidim për postin e kryetarit të LDK-së. Sepse një konkurrence e denjë e nivelit akademik, i bën nder në rend të parë LDK-së, prijësit të saj shpirtëror Dr. Ibrahim Rugovës dhe çdo kandidati që nominohet. Mungesa e përcaktimit të kritereve, kam frikën se e eliminon pikërisht këtë nivel të lartë shkencor për të konkurruar dhe ju krijon parakushte “partizanëve” të ndryshëm që, ta bëjnë çorbë këtë garim për kryetar partie duke trazuar çdo mëhallë në kërkim të votave, madje edhe përmes anketave e peticioneve paraprake.

Kuvendi i Përgjithshëm i LDK-së, do të jetë i vonuar për zyrtarizimin e kandidatëve për kryetar partie apo kryetar degësh, sepse nuk do t’ju mundësohet zyrtarisht të prezantojnë dhe bëjnë fushata me programet e tyre nëpër kuvendet e degëve apo edhe të nëndegëve e aktiveve, së paku. Kushtimisht nuk ka nevojë të organizohen tubime paralele brenda një fushate të një partie e cila pretendon të jetë akademi për partitë tjera politike. Dhe, këto kritere nuk janë përcaktuar deri tash, me fajin e kësaj kryesie e cila, le të dyshohet se dikujt do për t’ia ngushtuar hapësirën e dikujt për t’ia dhënë gjithë mundësitë e ekspozimit, falë postit aktual që ka në strukturat e partisë, madje edhe në kundërshtim me statutin aktual të partisë, siç është rasti me paralajmërimin që kryesia e partisë të dal më kandidatin e saj për kryetar partie.

Le të më tregojnë, shumë jam kureshtar për ta mësuar se në cilin nen statutar janë bazuar apo në ç’ kriter janë mbështetur. Sipas statutit në fuqi, këtë gjë mund ta bëjnë vetëm përmes një komisioni kandidues dhe atë pasi të jetë konvokuar Kuvendi i Përgjithshëm i LDK-së. Prandaj kanë qenë dhe janë të domosdoshme kriteret e përcaktimit me kohë për kandidatët për kryetar partie, gjë të cilën e kam kërkuar edhe në KP të LDK-së me 8 korrik 2006. Për paaftësi të kësaj kryesie apo thënë më drejtë për manipulim të qëllimshëm, biem në këso situatash paradoksale.

“Kosova Sot”: Ka rënie apo ngritje në imazhin e LDK-së, pas akuzave të ndërsjella në mes anëtarëve të KP-së dhe kryesisë se LDK-së

Sabit Rrustemi: Imazhin e LDK-së as nuk e ka ngritur e, as që mund ta zbres në masë të madhe kryesia aktuale e LDK-së. Këtë imazh e ka krijuar, mbajtur dhe zhvilluar në këto 16 vite figura brilante e Dr. Ibrahim Rugovës dhe anëtarësia e simpatizantët e saj anekënd Kosovës dhe jashtë saj, veçanërisht diaspora e fuqishme atdhetare e Kosovës.

Këtë imazh, kjo anëtarësi e LDK-së, me një përkushtim fanatik do ta ruaj dhe zhvillojë edhe më tutje, edhe për shkakun se ka investuar shumë në të po, edhe për dashurinë dhe respektin e madh që ka ndaj prijësit të saj të përjetshëm, përmes të cilit një botë e tërë erdhi në Kosovë.

Debati kritik dhe i argumentuar nuk mund të merret si akuzë dhe si prishje e këtij imazhi. Akuzë nuk e shoh as qasjen e vetme të një individi, qoftë ai edhe anëtar i Këshillit të Përgjithshëm. Një debat të mirëfilltë ne ia kemi pasur për borxh edhe dje, e, ia kemi për borxh sidomos tash anëtarësisë së LDK-së. Po, kryesia e partisë në nivel qendror e, madje edhe në nivele degësh, nuk i ka hapur udhë shumë këtij debati.

Debatin për LDK-në më shumë e kanë zhvilluar mas-mediat tona, veçanërisht këto të shkruarat se sa vetë strukturat e LDK-së. Ky debat, në rend të parë është dashur të niset nga kryesia e LDK-së, pastaj në Këshill të Përgjithshëm dhe, prej këtu, me qëndrime konkrete të bartet në anëtarësinë e gjerë përmes degëve, nëndegëve dhe aktiveve.

Kjo nuk ka ndodhur, nuk ndodhi as në mbledhjen e shumëpritur të KP të LDK-së, sepse kryesia e anashkaloi përmes rendit të punës, debatin. Edhe ai debat që u zhvillua dhe që ishte shumë konstruktiv, disi u përvodh brenda atyre pikave dhe, kryesia e punës, në fakt treshja e nënkryetarëve bëri mirë që dëshmoi një tolerancë edhe për këtë debat të tërthortë që u bë dhe, që dëshmoi edhe njëherë se KP i LDK-së, përkundër anashkalimit, ishte organi më i interesuar për ruajtjen dhe zhvillimin e partisë, në një parti të mirëfilltë demokratike.

Nëse veç mund të flasim për prishje imazhi në LDK, atëherë, kjo prishje apo rënie imazhi, më së shumti e ka goditur kryesinë e LDK-së, sepse tkurri veprimin brenda partisë, u mbyll kryekëput në guaskën e kryesisë, rrallë, shumë rrallë po thuaja më shumë se hiq, zbriti në bazë apo doli në terren. Terreni i tyre kryesor ishin hapësirat brenda lokaleve të partisë, të ndërtesës së qeverisë dhe të vetë Kuvendit të Kosovës. Pastaj vendimet më të mëdha dhe, më të rënda, i morën duke mos e përfillur statutin e partisë, në fakt duke mos i miratuar ato në KP të LDK-së. Nuk dhanë raport vjetor të punës e, as financiar në KP të LDK-së, të cilin e thirrën tek pas dy vjetësh e, kështu...

“Kosova Sot”: A mendoni qe ende fraksionet po e dëmtojnë imazhin e LDK-së?

Sabit Rrustemi: E kam thënë edhe më parë, madje pa modesti, mbasi i pari publikisht kam kërkuar legalizimin e tyre dhe, janë dëshmitë për këtë, fraksionet janë të dëmshme përderisa veprojnë në mënyrë ilegale. Në LDK ato gjithnjë kanë punuar nën rrogoz e, as nuk janë shpluar e, as i kanë shpluar sepse interesat për një veprim të tillë ishin të dyanshme.

Kur ky veprim u bë më bajat thuaja apo siç po talle çarshia nganjëherë, u bë “sekret publik”, ishte dhe edhe tash është e udhës që ato të legalizohen, të dalin në këtë apo atë toborr dhe mos të lënë “mullirin” pa ujë..

Prandaj e thashë në fillim që “Reforma” e Naser Rugovës është fraksioni i parë legal brenda LDK-së po që duhet legjitimuar brenda strukturave të partisë përmes zbritjes në bazë dhe, zgjedhjet që këto ditë do të fillojnë, janë një rast i mirë për këtë.

“Kosova Sot”: A i ka mbetur forcë LDK-së që pa Rugovën sërish të jetë partia e parë në Kosovë?

Sabit Rrustemi: Pa dyshim që LDK edhe më tutje do të jetë partia më e madhe në Kosovë dhe fituese e zgjedhjeve të ardhshme. Andaj është edhe kjo garë e madhe e të qenit i pari në parti dhe në kryesinë e partisë, njësoj si edhe në nivele degësh, që dëshmon forcën e LDK dhe interesin për të qenë brenda saj dhe, sidomos në krye të saj.

Kjo forcë dhe ky interes është edhe nëpër nivel degësh, madje shumë i madh sa ka përfolje se do zbresin dhe kandidohen për kryetar degësh edhe disa anëtarë aktual të kësaj kryesie. Si duket kanë nevojë dhe nuk ndihen të sigurt pa e përforcuar bazën përmes njerëzve të vet, pavarësisht se ky “rikuerc” ua prish bukur shumë imazhin. Madje, në një mënyrë kjo është edhe futje e karrierës nën gërshërë.

Garimi i mirëfilltë dhe në parimet e një demokracie të zhvilluar, vetëm sa do t’ia rritë forcën LDK-së.

Atje ku do të keqkuptohet gara, fushata do të kalojë në luftë “gjelash”. Do të ketë pastaj etiketa dhe nxjerrje në shesh të të palarave që i kanë krijuar gjatë kësaj kohe garuesit e ardhshëm të posteve në LDK që, edhe tash nuk janë pa to, qoftë në nivel degësh, komunash apo edhe qendre.

Kush e ka shijuar butësinë e foteles dhe privilegjet e pushtetit nuk besoj që nuk do t’i qaset garës, ani se me vështirësi do ta pranojë nivelin e garimit si dhe rezultatin e garës. Po, meqë fjala e fundit është në duart e anëtarëve të devotshëm të LDK-së, nuk e besoj që ata do të vendosin kundër investimit të deritashëm dhe në prag të definimit të statusit të Kosovës.

LDK dhe anëtarësia e saj e kanë për borxh që, pikërisht në këtë kohë jo vetëm të gjejnë e të krijojnë forca të reja po, t’i nxjerrin në pah edhe ato forca të akumuluara sepse ndryshe nuk nderohet as Kosova e, aq më pak Rugova, në emrin të cilit po thirremi sa herë që po dëshirojmë të përfitojmë më shumë. Madje veç çka nuk po kujdestarojnë disa edhe tek varri i tij, sa herë që atypari sillen kamerat e TV-ve.

“Kosova Sot”: A vazhdon të jetë i anashkaluar Këshilli i Përgjithshëm në shumicën e rasteve të vendosjes për çështje madhore, si në emërime të ndryshme ashtu edhe në vendosjen pro apo kundër mbajtjes së zgjedhjeve brenda LDK-së?

Sabit Rrustemi: Po. Kjo garniturë anëtarësh të këtij Këshilli, si organ që moti është i djegur, pavarësisht se pas dy vitesh arriti më në fund të tubohet njëherë po, edhe ai tubim përveç vendimit për shpalljen e zgjedhjeve në LDK nuk rezultoi me diçka tjetër.

Kryesia e LDK që kishte edhe obligim statutar, madje që nuk kishte propozuar as të ndërrohen ato pika ku kryesia i obligohet Këshillit sepse edhe zgjidhet prej tij, nuk i dha as raport madje as sinjal se do ta thërras edhe njëherë para fundit të këtij mandati, ani se një gjë e tillë u kërkua, madje nga disa e, edhe nga unë, u shtrua si domosdo, në rend të parë që të debatohet puna e deritashme e kësaj kryesie, për një pjesë dërmuese, puna tetëvjeçare e, për një pjesë të arnuar në kryesi, puna dyvjeçare si dhe kriteret për kandidimin e të interesuarve për kryetar partie. Po, më nuk ka mbetur as kohë e, besa as kuptim që të thirret ndonjë mbledhje e këtij Këshilli.

LDK meqë po hyn në fushatën zgjedhore brenda partiake, mbase më strukturën e re që pritet të dal nga këto zgjedhje, do të dijë dhe do të mund t’i përdorë më shlirshëm organet e veta vendimmarrëse dukë bërë afrimin dhe afirmimin e vlerave e, në anën tjetër duke injoruar servilët e demagogët që, fatkeqësisht ka edhe për eksport.

Ambiciozët dhe para se gjithash karrieristët, vështirë shmangen nga ekspozimi nëpër media.

“Kosova Sot”: Sipas juve cilin kandidat e shihni ju si kryetar të ardhëm të LDK-së, që ende nuk është ekspozuar nëpër media?

Sabit Rrustemi: Për mendimin tim, këta kandidatë tashmë janë identifikuar. Varet tash prej tyre se sa do të jenë të sigurt për t’ju qasur garës. Ata që i kanë dy kokrra mend, nuk do të hyjnë në këtë garë vetëm për të dëshmuar një dekor demokratik. Por, nuk e përjashtoj mundësinë që dikush do të tentojë për t’u kandiduar, më shumë për t’u afirmuar si kandidat i mundshëm se sa si kandidat që do të zgjidhet për kryetar partie.

Ajo që nuk po më pëlqen nga një pjesë e këtyre kandidatëve të identifikuar tashmë edhe me emra, është se, për një mbështetje më të madhe në terren nuk po i zgjedhin fare argatët, duke harruar se argatët e këqij gjithherë të lënë pa bereqet. Është për keqardhje po, për alamet emër kandidati që, ose ka kredibilitet shkencor e intelektual apo, edhe është në perspektivë e sipër të ngritjes në karrierë, të agjitojë lloj-lloj matrapazi e rrenci, të cilit nuk i beson as shtëpia e vet. Kam dronë që, ky soj i argatëve do ta zbeh me të madhe këtë fushatë dhe do ta degradojë këtë proces kaq të rëndësishëm për LDK-në.

Për veten time, parapëlqej kandidimin me marrëveshje, sepse marrëveshja siguron një bazë për kandidatin. Po, marrëveshja duhet të ekzistojë edhe mes vetë kandidatëve në respektimin e votës dhe të fituesit, p.sh. si në SHBA, ku ata që nuk e fitojnë garën, bëhen argat besnik të fituesit jo për të mirën e tij gjithaq sa për të mirën e partisë sepse aty është edhe interesi e, edhe investimi i përbashkët.