Ndahet nga jeta përkthyesi, gazetari dhe diplomati Eqerem Mete

-- nga Beqir SINA, Nju Jork

Vdiq Eqerem Mete - Diplomati modern i shkollës së vjetër

Boston, Massachusetts: Duke i referuar një artikulli "post-mortum", të gazetarit dhe kryeredaktorit të gazetës shqiptaro amerikane Illyria, z. Dalip Greca, thuhet se në moshën 64 vjeçare u nda nga jeta Eqerem Mete. Ai njihet si një nga njohësit më të mirë të anglishtes e si përkthyes i talentuar; për publicistikën e tij objektive, të argumentuar dhe me një patos të thellë patriotik e demokrat. Mete njëhereshit ishte dhe diplomati, i cili drejtoi me profesionalizëm, korrektesë e përgjegjshmëri të lartë drejtorinë e Ballkanit e të Lindjes së Mesme në Ministrinë e Jashtëme, në një nga periudhat më të vështira e delikate që po kalonte Shqipëria e sapodalë nga diktatura. Eqerem Mete njihet si njeri, i dashur e i sjellshëm me të gjithë, i ndershëm e me një modesti të rrallë.

Eqeremi lindi në Roshanj të rrethit të Kolonjës, më 12 tetor 1943. Pasi mbaroi me sukses studimet e larta për Gjuhën Angleze, në Fakultetin e Histori-Filologjisë të Universitetit të Tiranës, nisi punën si përkthyes e komentator në Radion e Jashtëme, të RTSH-së ku i duhej të punonte me orar e pa orar, për të përgatitur në kohë materialet e kërkuara. Dhe ndonëse një punë e mundimëshme që nuk do ta kishte pasur zili asnjë përkthyes, Eqeremi, falë cilësive e virtyteve të tij të larta, manifestoi dhe aty vlerat më të qënësishme të personalitetit të vet: i papërtuar, korrekt në marrëdhëniet me të tjerët dhe përherë i gatshëm për t’i ndihmuar kolegët, si për përkthimet në anglisht, ashtu dhe për probleme të tjera, nga më të ndryshmet.

Në vitet e para të pluralizmit, ai kalon në Ministrinë e Jashtëme, ku emërohet drejtor i Drejtorisë së Ballkanit dhe Lindjes së Mesme. Kjo i dha atij mundësinë të shpalosë vlera të tjera të personalitetit të vet, si diplomat e politikan i aftë, i shkathët e me përgjegjësi. Me entuziazmin e natyrshëm që sollën ndryshimet shoqërore dhe politike pas përmbysjes së sistemit diktatorial, ai iu përkushtua punës me tërë energjitë e veta, duke qënë i përgatitur si rrallë kush, veç të tjerash dhe nga akumulimi që kishte bërë për vite të tëra, në profesionet e mëparshme, por që kushtet e atëhershme nuk i kishin dhënë mundësi për t’i sendërtuar. Për këdo është e qartë se sa e vështirë e me përgjegjësi ishte detyra e diplomatëve tanë në ato vite, nga që u duhej të çanin në rrugë të pashkelura më parë, në përshtatje me klimën e re që krijoi shëmbja ë Komunizmit dhe fundi i Luftës së Ftohtë. Vëmendje të veçantë sektori që drejtonte ai, i kushtoi çështjes së Kosovës, kur Millosheviçi po ndizte motorët për të filluar raprezaljet e egra mbi të.

Ngjarjet e ’97-ës, e detyruan dhe Eqeremin, si shumë të tjerë, të marrë rrugën e mërgimit. Vitet e fundit ai punoi e jetoi në Boston, por pa e ndërprerë punën e tij si publicist e përkthyes, duke bashkëpunuar me gazeta të vendit e të diasporës, si “Albania”, “Illyria” etj. Çdo publikim i tij ka lënë mbresa tek lexuesit. Mjafton të kujotjmë, me këtë rast, vetëm ndonjë syresh, siç janë një sërë shkrimesh për pavarësinë e Kosovës dhe sidomos për ritheksimin e përpjekjeve të nëpunësve të ndershëm e patriotë të shtetit shqiptar, për të respektuar embargon e naftës ndaj Jugosllavisë. E këtu Eqeremi ngriti zërin në kundërshtim me deklaratat e mbarsura politikisht e me spekullime nga ish eprorë të tij. Qëndrimi i Eqerem Metes mbi kete çështje ishte dinjitoz dhe i përkushtuar ndaj të vërtetës.