DARDANIA - KOSOVA E VOGËL QË I KA DHURUAR BOTËS FIGURA DHE VLERA TË MËDHA HISTORIKE

-- nga Caio Werneck

Studentët e së drejtës ndërkombëtare të këtij fakulteti janë mahnitur me ligjëratën e ilustruar të Prof Engjëll Koliqit, deri në derdhjen e lotëve. Ata kanë shfaqur interesim që ta njohin nga afër realitetin e popullit shqiptar dhe Kosovën.

Prof. Engjëll Koliqi me një grup studentësh e profesorësh, pas ligjëratës

Belo Horitonte, 21 qershor 2007 - Profesori nga Kosova - Engjëll Koliqi, i cili çdo ditë e më shumë po bëhet i njohur dhe më i dashur në vendin tone, dje ka ligjëruar në Fakultetin Juridik të Universitetit Federal të Minas Gerais-it, në Belo Horizonte. Kjo ligjëratë e tij është vlerësuar shumë e frytshme dhe studentëve të katedrës së të drejtës ndërkombëtare u ka dhënë një impuls të ri në dëshirën e tyre vullnetmirë, për ta njohur nga afër realitetin e popullit shqiptar dhe Kosovën dhe për ta ndihmuar aq sa munden me kompetencat dhe fuqitë e tyre, këtë shtet në linde, që së shpejti, me një "pagëzim" në KS të OKB-së, do të njihet ndërkombëtarisht dhe - pas një periudhe shtyllash, do të ecë vetë dhe lirshëm, në historinë që i ka shumë borxhe.

Prof. Engjëll Koliqi gjatë ligjëratës së ilustruar

Z. Koliqi ka bërë një shëti nëpër shekuj, madje edhe duke ilustruar bukur përmes projektorit, duke konkretizuar çdo gjë me të dhëna të sakta historike dhe me fotografi, në programin kompjuterik "power point", përgatitur me një mjeshtri të rrallë profesionale. Ai ka dhënë mjaft fakte për ekzistimin e Dardanisë, së paku dhjetë shekuj para Krishtit. Ka përmendur Justinianin, Dioklecianin dhe perandorët tjerë që gjatë pushtimit shtatëshekullor, Iliria i ka dhënë Perandorisë Romake. Sidomos emocional ka qenë argumenti i Perandorit Konstantin, nga toka e Dardanisë, i cili njerëzimit i ka dhuruar aktin e parë të demokracisë, me lirimin e besimit fetar. Gjithashtu me argumente i ka bindur studentët për vargun e shenjtërve iliro-dardanë: Shën Flori, Shën Lauri, Shën Maksimiliani, Shën Prokupi, Shën Niketë Dardani, i cili është autori i Hymnit të Kishës Univerzale TE DEUM, që edhe sot këndohet në mbarë botën, Shën Jeronimin etj. Gjithashtu ka sjellë edhe argumentet për shtatë papët iliro-shqiptarë, në Selinë e Shenjtë - Papa Shën Eleuteri (171 - 185), nga Nikopoli (sot në Greqi - Çamëri) Papa Shën Urbani I (222 - 230), Papa Shën Kai (283 - 296), Papa Gjoni IV (640 - 642), Papa Pali IV (1555 - 1559), arbëresh nga Karafa e Katanxaros, Papa Sisti V (1585 - 1590), nga familja Pereti, emigruar në Itali nga Krusheva e Kotorrit - Mal i Zi, Papa Klementi XI (1700 - 1721), nga familja Laçi-Albani, emigruar nga Shqipëria në Urbino të Italisë në vitin 1464.

Prof. Engjëll Koliqi pranë universitetit UFMG

Pasi ka mbaruar me periudhën shtatëshekullore të pushtimit romak, ligjëruesi nga Kosova ka folur mbi dyndjet sllave, respektivisht mbi serbët, të cilët duke qenë si maxhypë e shërbëtorë (servi-serbi = shërbëtorë) të rusëve, duke mos e duruar më gjendjen e shërbëtorit kishin ikur nga Karpatet dhe ishin shtrirë në jug, nëpër tokat dardane. Duke qenë një popull paqedashës dhe mikpritës, ilirët, respektivisht shqiptarët, duke iu shmangur problemeve, gjithnjë janë tërhequr në jug dhe serbët kanë gllabëruar tokat tona, ka thënë ligjëruesi. Nga mbi 110 mijë km² sa ka pasur Dardania, Kosova e sotme duhet të kënaqet me pranimin shtet mbi një territor më të vogël se 11 mijë km².

Pastaj ka vazhduar me pushtimin 535 vjeçar nga ana e Perandorisë Turko-Otomane, të cilët kanë shkatërruar, ku kanë mundur, çdo gjë shqiptare. Duke folur mbi këtë periudhë, Ai ka lartësuar figurën e Heroit Kombëtar, i cili plot 25 vjet ka qenë mbrojtës i krishterimit europian nga otomanët, Gjergj Kastrioti - Skënderbeu, i shpallur nga papa i atëhershëm, si atlet i Krishtit. Atë e ka krahasuar me Heroin Kombëtar Brazilian - Tiradentes. Duke e përmbyllur periudhën e pushtimit turko-otoman, ligjëruesi ka thënë se marrëveshja e fshehtë ruso-turke, ishte legalizuar nga fuqitë e mëdha të kohës - në Kongresin e Berlinit të vitit 1878 dhe në Konferencën e Ambasadorëve në Londër, më 1912/1913, duke ia falur Serbisë dhe Greqisë më shumë se gjysmën e tokave shqiptare. E njëjta gjë tha ai ka ndodhur edhe pas mbarimit të dy luftërave botërore. Shkak i fillimit të luftës së parë botërore - tha ai - ishte vrasja nga serbët e Princit Austro-Hungarez - Franc Ferdinandit, i cili kishte fotografuar argumentet mbi Manastirin e Graçanicës, të falsifikuar, nga një katedralë katolike në një manastir ortodoks. Duke folur për shekullin tonë të jetës, Profesor Engjëlli ka thënë se Kosova e Vogël ia fali botës Nënën e Madhe e Shenjtëreshën e Dashurisë, Gonxhe Bojaxhiun - Nënën Tereze. Edhe sot, shqiptarët, që pamarrë parasysh besimin fetar, ndjehen bij të Nënës Tereze, të stimuluar nga mësimet dhe amaneti i Saj, nuk duan ta njohin urrejtjen, por duan që botën ta ndryshojnë me dashuri.

Duke folur për luftën e fundit në Kosovë - Luftën Çlirimtare të viteve 1998-1999, Koliqi ka argumentuar edhe me foto tmerret e kriminelëve serbianë mbi popullatën shqiptare të Kosovës, deri në gjenocid, si dhe trimërinë e paparë dhe maturinë e profesionalitetin e lartë të Ushtrisë Çlirimtare të Kosovës, duke filluar që nga flijimi i Familjes Jashari e deri në ditën e çlirimit, kur aleatët tanë të NATO-s, pas bombardimeve 78 ditëshe e detyruan kryekriminelin Milosheviq të dorëzohet dhe të nënshkruajë Marrëveshjen e Kumanovës (10 qershor 1999), për tërheqjen e forcate serbe nga Kosova dhe për lënien e Kosovës nën administrimin dhe protektotratin ndërkombëtar të OKB-së. Kur ligjëruesi tha se ka edhe shumë foto të tjera të tmerrshme, që dokumentojnë gjenocidin e Serbisë mbi popullin e Kosovës, por që të mos i tmerrojë dhe që të mos nxis urrejtje ndaj një populli, nuk i publikon Ato këtu, disa nga studentët kanë qarë me lotë, duke pohuar se po shohin në vepër, edhe në profesorin, mësimet e shenjta të Nënës Tereze - Kosovare. Ai gjithashtu ka folur edhe për rolin vendimtar dhe të pakontestueshëm të Presidentit të Parë të Republikës së Kosovës - të urtakut dhe shkencëtarit të dëshmuar edhe në politikë e në aktet historike të shtetformimit - Dr. Ibrahim Rugova.