KRYQI I KUQ I MINAS GERAIS, I GATSHËM TA NDIHMOJË KOSOVËN NË LËMIN E SHËNDETËSISË

Presidenti i Kryqit të Kuq Mineir - Dr. Delzio Bicalho, i tha z. Koliqi se e njohin bukur mirë gjendjen në Kosovë dhe nevojat e atjeshme për ndihma ndërkombëtare dhe i premtoi se gjithçka munden do bëjnë në këtë drejtim e do të kontribuojnë sidomos në lëmin e shëndetësisë. Mysafiri nga Kosova i falënderoi dhe kërkoi që gjithçka të shkojë përmes rrugëve institucionale. Ai kërkoi ndërhyrje urgjente për dy raste konkrete, për të ndihmuar shërimin e dy pacientëve nga Gjilani.

Engjëll Koliqi gjatë bisedimeve me drejtuesit e Kryqit të Kuq

Belo Horizonte, 27 qershor 2007 - Veprimtari apolitik nga Stublla e Kosovës - Engjëll Koliqi, i njohur tashmë në vendin tonë edhe si gazetar e shkrimtar i shquar, dje, i shoqëruar nga Prof Dr Vera Lucia Alves Neves e Prof Esmeralda Carvalho Castro, në kuadër të Organizatës Ndërkombëtare CAN (organizatë për planifikim dhe implementim projektesh ndërkombëtare, ushtrime e planifikime ligjëratash, organizime konferencash dhe shoqërim misionesh nga jashtë), është pritur nga kryesia e Kryqit të Kuq të Brazilit, në selinë qendrore të kësaj organizate humanitare për shtetin Minas Gerais, në Belo Horizonte. Në pritje ishin kryesia komplete, me këtë përbërje: Dr Delzio Bicalho - president, Dr Delzio Salgano - nënkryetar, Marcia Fafà - sekretare e përgjithshme, si dhe anëztarët tjerë të kryesisë (këshilltarët): Dr Alberto Freire, Dr Álvaro Vasconcelos, Dr Eduardo Biagioni, Dr Gilberto Madeira, dhe Cristiane Siqueira.

E para, në këtë takim të përzemërt e ka marrë fjalën Profesoresha e nderuar Dr Vera Lucia Alves Neves, e cila, mbasi që ka bërë prezantimin dypalësh, i ka njohur mikpritësit me zanafillën e bashkëpunimit Brazil-Kosovë. Ajo ndër të tjera ka thënë se Kosova sot ka nevojë për gjithçka, por falë pasurive të saja njerëzore dhe minerale, nesër mund të jetë një nga shtetet më të zhvilluara në botë. Gjithashtu ajo ka thënë se është në përgatitje të një portokolli për shkëmbime vizitash të delegacioneve shtetërore, në nivel deputetësh, ministrash e guvernatorësh, përfshirë edhe presidentët e të dy vendeve.

Në takimin, që ka zgjatur rreth një orë e gjysmë, z. Koliqi i ka njoftuar mikpritësit me zhvillimet aktuale në Kosovë dhe rreth Kosovës, që nga Prishtina e deri në New York, ku së shpejti do të njihet pavarësia e këtij vendi, në KS të OKB-së. Ai ka folur sipërfaqësisht për zhvillimet politiko-diplomatike dhe të sigurisë, për t'i lënë vend më shumë gjendjes ekonomiko-sociale, me të cilën aktualisht përballet Kosova. Duke folur në këtë temë mysafiri nga Kosova ka thënë se vjen nga Stublla, i vetmi vendbanim në Kosovë me përbërje të popullsisë 100% katolikë dhe mu për këtë shkak, si rrjedhojë e vlerave të larta solidare dhe të traditës shembullore të tolerancës ndërfetare, fshati i tij i bukur është i privilegjuar nga institucionet shtetërore të Kosovës, por edhe nga shumica e vëllezërve myslimanë.

Nga ky institucion i lartë humanitar, ai ka kërkuar ndihma në lëmin e shëndetësisë, sepse - siç ka theksuar - Kosova ka kuadër mjekësor shumë të përgatitur profesionalisht, por mjerisht mungon teknologjia dhe mjetet me të cilat realizohet mjekimi dhe shërimi i njerëzve, duke shtuar se në mungesë të këtyre mjeteve ende në vendin e tij mungojnë disa klinika, siç janë: kardiokirurgjia, klinikat për transplatime organesh etj. Qeveria jonë, nga buxheti i varfër harxhon shumë mjete financiare edhe për dërgimin e pacientëve për shërim jashtë vendit, me përjashtim kur ata shkojnë përmes Shoqatës "Nëna Tereze", apo organizatave të tjera humanitare - ka thënë ai.

Konkretisht i ka lutur mikpritësit për ndërhyrje urgjente në shërimin e dy pacientëve nga Gjilani (një rast që kërkon shërim në klinikat braziliane dhe rasti tjetër që kërkon dërgimin e barërave të shtrenjta, për një vit, që vetë nuk mund t'i paguajë). Në përfundim Ai u ka thënë drejtuesve të Kryqit të Kuq Mineir se i falënderon paraprakisht për të gjitha ndihmat që do japin për shëndetësinë në Kosovë dhe se vendi i tij, nëse nuk mund t'i shpërblejë me dhurata materiale, do ta porosis Bekimin e Shenjtëreshës së Dashurisë, që ndihmoi nevojtarët dhe të sëmuarit në botën mbarë - Nënës Tereze, e cila ishte bijë Kosove. Me këtë rast ka fituar një duartrokitje të gjatë dhe të gjithë janë ngritur në këmbë, në nderim të së Lumturuarës Gonxhe Bojaxhiu - Nëna Tereze.