HAPEN DYERT E BASHKËPUNIMIT TË UNIVERSITETIT TË PRISHTINËS ME UNIVERSITETET BRAZILIANE

-- nga Esmeralda CARVALHO CASTRO

Profesorët e universiteteve të Belo Horizonte-s, mbas premtimeve të mëparshme, janë marrë vesh me rektorët e tyre dhe i kanë dorëzuar Z. Koliqi dokumentacionin për fillimin e bashkëpunimit me Universitetin e Prishtinës. Ai u ka premtuar se gjatë muajit korrik do të takohet në Prishtinë me rektorin Prof Enver Hasani dhe do t'ia dorëzojë këto dokumente, me bindjen se bashkëpunimi do të fillojë menjëherë. Akademik Esat Stavileci ftohet, që në muajin shtator ta përfaqësojë Kosovën, në një konferencë ndërkombëtare - në Belo Horizonte, për të drejtën ndërkombëtare, ku do të jenë edhe ambasadorë të shumë shteteve të akredituar në Brazil.

Prof. Márcio Luis de Oliveira, autori koordinator i librit të parë, me shumë bashkautorë - studentë, duke ia dhuruar atë Engjëll Kolikqit

Belo Horizonte, 28 qershor 2007 - Veprimtari shumëdimensional, nga Stublla e Kosovës - Engjëll Koliqi, i cili tashmë në vendin tonë po konsiderohet edhe si ambassador i Kosovës në Brazil, parmbrëmë, si i ftuar special, ka marrë pjesë në një një promovim librash shkencorë, mbi të drejtat e njeriut, në librarinë e specializuar për tekste dhe vepra të shkencave të drejtësisë, të Shtëpisë Botuese "Del Rey", në Belo Horizonte.

Si zakonisht, edhe në këtë takim, Ai ishte i shoqëruar nga presidentja e Organizatës Ndërkombëtare CAN (organizatë për planifikim dhe implementim projektesh ndërkombëtare, ushtrime e planifikime ligjëratash, organizime konferencash dhe shoqërim misionesh nga jashtë) - Prof Dr Vera Lucia Alves Neves (profesoreshë universiteti e pensionuar), e cila tashmë është edhe ndërmjetësuesja e përkthyesja e rregullt e Z. Koliqi (italisht-portugalisht dhe anasjelltas), në këto takime. Përveç profesorëve të tjerë dhe shumë studentëve, Ai në këtë mbrëmje është përqafuar edhe me autorët e dy librave shumë të rëndësishëm mbi të drejtat e njeriut, që u promovuan: Márcio Luis de Oliveira dhe Fernando G. Jayme, që të dy profesorë të së drejtës në Universitetin Federal të Minas Gerais-it në Belo Horizonte, e i dyti edhe funksionar i lartë i rektoratit. Ata, i dhuruan - me dedikim special, mysafirit nga Kosova nga një kopje të librave të tyre - "O Sistema Interamericano de Proteção dos Direitos Humanos" (Mbi Sistemin Ndëramerikan të Mbrojtjes së Të Drejtave të Njeriut) dhe "Direitos Humanos e sua efetivação pela Corte Interamericana de direitos humanos" (Të Drejtat e Njeriut dhe efektiviteti i tyre në Gjykatën Ndëramerikane të të Drejtave të Njeriut).

Mbas urimeve për librat e rinj, simbas premtimeve të para disa ditësh, kur ai mbajti një ligjëratë në Fakultetin e Drejtësisë të UFMG (Universitetit Federal të Minas Gerais-it), profesorët i dorëzuan Z. Koliqi dokumentacionin zyrtar, për rektorin e Universitetit të Prishtinës - Prof Enver Hasani, me propozimet për bashkëpunimin dypalësh, gjithnjë në kufinjtë e reciprocitetit, në shkëmbimin e përvojave shkencore, didaktike e organizative, si dhe në shkëmbimin e profesorëve dhe të studentëve në mes dy universiteteve. Ai u ka premtuar mikpritësve se gjatë muajit korrik do të takohen me rektorin e Universitetit të Prishtinës dhe do t'ia dorëzojë të gjitha këto dokumente, duke shprehur bindjen se do të jenë shumë të mirëpritura dhe se bashkëpunimi mund të fillojë menjëherë. Me këtë rast grupi I studentëve, bashkautorë të librit të pare të sipërpërmendur, në koordinim me profesorin de Oliveira, me gëzim thanë se janë të gatshëm të udhëtojnë për në Prishtinë, që në shtator, nëse kjo u mundësohet, me një bashkëpunim mes dy universitetesh.

Prof. Fernando G. Jaymes, duke ia dhuruar Engjëll Koliqit librin e tij