PRITJE E PËRZEMËRT DHE SOLIDARITETI NË VEPËR

-- nga Caio WERNECK

Në këtë spital, me qindëra pacientë, me sëmundje psiko-fizike e morike, edhe të palëvizshëm, që funksionon vetëm nga donacionet e njerëzve dhe pak të ndërmarrjeve e kompanive afariste, tash e mbas do të pranohen për shërim edhe pacientë nga Kosova. Drejtoria sapo ka pranuar kërkesën e Koliqit për shërimin këtu të një fëmije nga Gjilani.

Engjëll Koliqi, me themeluesin Célio de Oliveira Trópia

Belo Horizonte, 28 qershor 2007 - Veprimtari dhe intelektuali i shquar nga Stublla e Kosovës - Engjëll Koliqi, gjithnjë në shërbim të humanitetit dhe solidaritetit për popullin e Tij, dje, si zakonisht i shoqëruar nga profesoreshat e nderuara - Prof Dr Vera Lucia Alves Neves e Prof Esmeralda Carvalho Castro, në kuadër të Organizatës Ndërkombëtare CAN (organizatë për planifikim dhe implementim projektesh ndërkombëtare, ushtrime e planifikime ligjëratash, organizime konferencash dhe shoqërim misionesh nga jashtë), ka vizituar Qendrën shëruese e rehabilituese për pacientët me sëmundje psiko-fizike dhe motorike - Bashkësinë Asistenciale "Ecje drejt Jezusit".

Mysafirët me drejtorin e përgjithshëm Raul Alberto Marinuzzi

Ata janë pritur nga drejtoria e kësaj qendre - Drejtori Financiar e themeluesi i Qendrës - Célio de Oliveira Trópia, drejtori i përgjithshëm - Raul Alberto Marinuzzi, zëvendësdrejtori i përgjithshëm - Nelson Luiz Ferriera Bortot, nga sekretarja Nivaldo Miranda dhe drejtori administrativ - Ruy Estrêla Rego. Së pari mysafirët janë njoftuar, në drejtori, për veprimtarinë e përgjithshme dhe organizimin e punës në këtë qendër të madhe, ku punojnë me rrogë 429 të punësuar - mjekë, specialistë, infermierë, fizioterapeutë, psikologë, pedagogë, sociologë… Anëtarët e drejtorisë, që janë të pensionuar, punojnë vullnetarisht, pa kurrëfarë kompenzimi. Kurrë në këtë qendër nuk kanë hyrë mjete financiare nga Qeveria, as nga familjet e pacientëve, por vetëm nga njerëzit vullnetmirë, që japin pare dhe mjete materiale e aparatura mjekësore, si dhe deri dikund nga ndërmarrje dhe kompani afariste. Themeluesi i kësaj qendreje - zemërmadhi Célio de Oliveira Trópia, që para 38 vitesh (në vitin 1969), kur e ka themeluar, ka vendosur kështu. Gjithçka me donacione dhe shërime e trajtime krejtësisht gratis. Në këtë qendër - siç ka rrëfyer Drejtori i Përgjithshëm - ka mbi njëmijë ndërhyrje shërbyese në ditë. E kishin bërë brenda fabrikën e pelenave, sepse gjatë ditës këtu harxhoheshin mbi 800 pelena. Kurrë në 38 vjetët e kaluar, nuk kishte pasë asnjë problem financiar, as keqpërdorime.

Foto e Nënë Terezës, Princeshës Diana dhe një lutje

Pastsaj, mysafiri nga Kosova i ka njoftuar mikpritësit me zhvillimet aktuale në Kosovë dhe rreth Kosovës dhe me hallet e problemet e popullit atje, duke theksuar sidomos problemet në lëmin e shëndetësisë, ku mungojnë me të madhe teknologjia, barërat dhe mjetet tjera për shërbimet shëndetësore. Ai ka thënë se shumë pacientë vdesin "pa egjel" vetëm pse atje nuk ka kushte shërimi e jashtë vendit nuk kanë mundësi financiare të shërohen. Kur u ka shpjeguar një rast sëmundjeje të një fëmije nga Gjilani, ata menjëherë kanë pranuar që fëmija të sillet këtu për shërim. Në këtë qendër - kanë thënë drejtuesit - janë gjithmonë dyert e hapura për pacientët nga Kosova dhe nga çdo vend që ka halle të tilla. Ai, i emocionuar ka thënë se këtu i duket vetja sikur të ishte në një qendër të Misionareve të Dashurisë, themeluar nga Gonxhe Bojaxhiu - Nëna Tereze, të cilën vetë themeluesi e kishte gjitrhmonë idol, në këtë veprimtari të madhe humane.