ARTISTI NGA STUBLLA E KOSOVËS ARGËTON TË SËMUERIT DHE PERSONELIN ME ÇIFTELI

Artistët e repartit të dentistëve të kësaj qendreje, tashmë e kanë bërë si traditë, që çdo të premte të fundit të muajit të organizojnë nga një koncert këngësh popullore braziliane, në ambientet e Bashkësisë Asistenciale "Ecje drejt Jezusit". Këtë të premte në program u angazhua edhe mysafiri special nga Kosova, i cili i argëtoi të pranishmit me dy këngë popullore shqiptare, me instrumentin karakteristik që e përdorin vetëm shqiptarët, që i thonë çiftelia.

ENGJËLL KOLIQI DUKE KËNDUAR ME ÇIFTELI

Belo Horizonte, 30 qershor 2007 - Vetëm pas dy ditësh, veprimtari nga Stublla e Kosovës, tashmë i mirënjojhur dhe i dashur në vendin tonë - Engjëll Koliqi, u rikthye në Bashkësinë Asistenciale "Ecje drejt Jezusit", që është qendër shëruese e rehabilituese për pacientët me sëmundje psiko-fizike dhe motorike. Erdhi këtu shkrimtari e veprimtari i madh, sot në rolin e artistit, me çifteli.

Personeli i repartit të dentistëve të kësaj qendreje, si artistë të shquar që janë, tashmë e kanë bërë si traditë që çdo të premte të fundit të muajit, në ambientet e Bashkësisë të organizojnë një koncert të muzikës popullore braziliane, për t'i kënaqur kështu pacientët dhe personelin e kësaj qendre. Drejtori i përgjithshëm - Raul Alberto Marinuzzi dhe drejtori financiar e themelues i kësaj bashkësie - Célio de Oliveira Trópia, e kanë ftuar dje Z. Koliqi-n për dy arsye: që t'ua sjellin të dhënat e fëmijës nga Gjilani, për t'ia bërë ftesën zyrtare për trajtim në këtë qendër, që i shërben për marrjen e vizës dhe për ta angazhuar në koncertin e qershorit, bashkë me artistët e këtushëm, me muzikë shqiptare, me çifteli.

TË PRANISHMIT NJIHEN ME ÇIFTELINË,
SI INSTRUMENT KARAKTERISTIK VETËM I SHQIPTARËVE

Ishte vërtetë shumë tërheqës koncerti i artistëve nga reparti i dentistëve, por kësaj radhe dukej i mrekullueshëm, sepse mysafiri nga Kosova, edhepse gjatë prezantimit të dy këngëve të tij ("Tremijë vjet Kosova e Re" dhe "Na këndojnë pushkët nëpër kulla"), tha se është një amator i thjeshtë, ai si artist i vërtetë ia dha koncertit ngjyrat e vërteta artistike dhe e bëri më të vezullueshëm. Kjo u vërtetua edhe nga duartrokitjet e gjata të publikut.