DREJTUESIT E PALLATIT TË ARTEVE KËRKOJNË BASHKËPUNIM KONKRET DHE SHKËMBIME KULTURORE ME KOSOVËN

-- nga Esmeralda CARVALHO CASTRO

Ky institucion i kulturës dhe artit, që është më i madhi në Amerikë (me gjithsejt katër salla spektaklesh - vetëm salla e madhe ka 1707 ulëse). Gatishmëri e gjithanshme e mikpritësve për shkëmbime kulturore-artistike me Kosovën.

Poeti Engjëll Koliqi i dhuron poezinë e vet
TE ADORO Presidentes Lucia Camargo

Belo Horizonte, 5 korrik 2007 - Veprimtari i mirënjohur nga Stublla e Kosovës - Engjëll Koliqi, dje, ka pasur edhe një takim shumë të rëndësishëm, në shërbim të vendit të tij, në kryeqytetin mineir. Ai është pritur, në Pallatin e Arteve - më i madhi në Amerikë, me katër salla spektaklesh, ku vetëm salla e madhe ka 1707 ulëse, nga drejtueset e Fondacionit Qeveritar "Clóvis Salgado" që administron këtë qendër - Presidentja, Lucia Camargo dhe kryeshefja për planifikim - Cláudia Garcia Elias.

Z. Koliqi, mbasi i ka falënderuar për mikpritjen në muajin mars, kur ishte me delegacionin e Komunës së Vitisë (Kryetarin e Kuvendit të Komunës, Musa Misini dhe këshilltari - Sarë Gjergji), si dhe për gatishmërinë e shprehur që atëherë për të filluar bashkëpunimin me Kosovën, u ka kërkuar falje për mosrealizimin e vizitës së ministrave të Qeverisë së Kosovës, për shkaqet tashmë të njoura nga të gjithë (pritja e aktit final të njohjes së pavarësisë), u ka premtuar se kjo vizitë do të realizohet së shpejti dhe se do të jetë Ministri i Kulturës i Qeverisë së Kosovës ai që to t'i nënshkruaj të gjitha marrëveshjet e bashkëpunimit.

Mikpritëset e kanë informuar mysafirin nga Kosova për zhvillimet e fundit kulturo-artistike në këtë pallat të bukur e madhështor dhe i kanë premtuar se këtu artistët nga Kosova i kanë gjithmonë dyert e hapura. Presidentja - Lucia Camargo ka thënë se nuk është harruar premtimi për organizimin e Javës së Kulturës Kosovare, në Belo Horizonte dhe se për këtë mbetet vetëm të nënshkruhet marrëveshja dhe të caktohet data. Ajo gjithashtu është interesuar edhe për shkëmbime kuadrosh profesionale, në lëmin e arteve muzikore. Kësaj radhe është përmendur emri i Kompozitorit të Madh - Akil Koci, i cili do të ftohet së shpejti nga ky institucion i lartë i kulturës, për një vizitë dhe për shqyrtimin e mundësive të bashkëpunimit të ngushtë.

Si zakonisht në veprimtaritë e turneut të dytë të misionit të tij në vendin tonë, Z. Koliqi, edhe në këtë takim ishte i shoqëruar nga presidentja e Shoqërisë Affariste DIPROJINT - Intermediação e Projetos Internacionais (DIPROJINT - Ndërmjetësime dhe Projekte Ndërkombëtare).