UNIVERSITETI FEDERAL PUBLIK I MINAS GERAISIT I HAP DYERT PËR UNIVERSITETIN E PRISHTINËS

-- nga Esmeralda CARVALHO CASTRO

Bazuar në takimin e djeshëm, veç mund të thuhet se tashmë është gjithçka e gatshme për fillimin e bashkëpunjimit të Universitetit Federal të Minas Gerais-it, me Universitetin e Prishtinës, në Kosovë, me shkëmbime përvojash, kuadrosh profesionale dhe studentësh.

Engjëll Koliqi me Drejtoreshën e Marrëdhënieve Ndërkombëtare
të UFMG - Prof. Dr. Eliana R. de Freitas Dutra

Belo Horizonte, 6 korrik 2007 - Veprimtari nga Stublla e Kosovës - Engjëll Koliqi, i shoqëruar nga Presidentja e DIPROJINT - Intermediação e Projetos Internacionais (DIPROJINT - Ndërmjetësime dhe Projekte Ndërkombëtare), Prof Dr Vera Lucia Alves Neves (profesoreshë universitrare e pensionuar), dje, në selinë e rektoratit të Universitetit Federal të Minas Gerais-it, është pritur nga Drejtoresha e Marrëdhënieve Ndërkombëtare - Prof Dr Eliana R. de Freitas Dutra. Ishte ky një takim i përzemërt, që sipas të gjitha gjasave, i ka hapur njëherë e përgjithmonë dyert e Universitetit Federal të Minas Gerais-it, në Belo Horizonte, për ekspertët, profesorët dhe studentët e Universitetit të Prishtinës.

Mbas ligjëratës së mrekullueshme, mbi Kosovën, të Z. Koliqi në Fakultetin Juridik të këtij universiteti, ishte para së gjithash një trysni nga ana e studentëve të së drejtës ndërkombëtare në rektorat, për t'i hapur dyert e bashkëpunimit me Universitetin e Prishtinës. Një grup studentësh janë të interesuar, që sa më parë ta vizitojnë Kosovën dhe të fillojnë miqësitë dhe bashkëpunimin me moshatarët e tyre atje.

Engjëll Koliqi me prof. Vera Lucia

Para këtij takimi ka ndodhur një "skenë" shumë interesante. Rastësisht kemi takuar në korridorin e rektoratit një studenteshë kroate, e cila po studjonte këtu, në kuadër të bashkëpunimit të rregullt, në shkëmbimin e studentëve. Z. Koliqi ka biseduar me studenteshën kroate - Klara Karadža, italisht dhe kroatisht. Ajo ka thënë se do të gëzohet shumë kur të mbërrijnë këtu edhe studentët kosovarë, me të cilët do të zinte miqësi dhe do të bashkëpunonte.

Profesoresha de Freitas Dutra, në biseedë me mysafirin nga Kosova, ka thënë se paraprakisht, lidhur me këtë ka biseduar me rektorin dhe se Universiteti Federal i Minas Gerais-it ka interesim të bashkëpunojë me Universitetin e Prishtinës. Bashkëpunimi do të shtrihej në fushat shkencore, të hulumtimeve dhe në realizimin e projekteve zhvillimore të solidaritetit, në bashkëpunim edhe me institucionet shtetërore dhe me ndërmarrjet që i realizojnë projektet konkrete. Janë përmendur fushat e mineralogjisë, të bioteknikës, bioenergjisë, mjekësisë etj. Ajo ka thënë se së shpejti do të ftohet për një vizitë këtu rektori i Universitetit të Prishtinës, e gjitrhashtu edhe rektori i UFMG të Belo Horizonte-s është i gatshëm për udhëtim deri në Prishtinë. Dyert e bashkëpunimit me Kosovës, këtu janë gjithmonë të hapura - ka përfunduar mikpritësja, duke theksuar bazën kryesore të bashkëpunimit - respektimin reciprok.

Engjëll Koliqi me studenten kroate Klara Karadža