KOSOVA DHE E DREJTA NDËRKOMBËTARE E SHTETËSISË SË SAJ

-- nga Caio Werneck

Grupi i studjuesve të së drejtës ndërkombëtare (mbi 20 studentë dhe profesorë) kanë ndjekur me shumë vëmendje ligjëratën e veprimtarit kosovar dhe kanë pranuar se ata kanë pasë të dhëna të gabueshme për këtë çështje shumë të ndjeshme të diplomacisë botërore, që këto ditë pritet ta sjellë vendimin historik për Kosovën, në KS të OKB-së. Drejtues të këtij universiteti kanë shprehur gatishmërinë e bashkëpunimit me universitete në Kosovë, deri në shkëmbim mësimdhënësish e ekspertësh fushash të ndryshme shkencore, dhe të studentëve. Në një takim ndërkombëtar të analistëve akademikë të së drejtës ndërkombëtare, në shtatorin e ardhshëm, do të përfaqësohet edhe Kosova. Pritet të ftohet Akademik Esat Stavileci.

Engjëll Koliqi, gjatë ligjëratës

Belo Horizonte, 3 qershor 2007 - Veprimtari e shkrimtari kosovar Engjëll Koliqi, tashmë i mirënjohur në vendin tonë, në vazhdën e veprimtarive të tij të bujshme, në kryeqytetin mineir Belo Horizonte, dje ka ligjëruar në Universitetin FUMEC. Ligjërata e tij "Kosova dhe e drejta ndërkombëtare e shtetësisë së saj" është përcjellur me interesim të jashtëzakonshëm, nga mbi 20 studentë dhe profesorë të grupit të studjuesve të së drejtës ndërkombëtare, që ishin mbledhur në kuadër të takimeve tradicionale të së shtunës, për ta analizuar një problematikë të diplomacisë ndërkombëtare.

Engjëll Koliqi, në universitetin FUMEC

Meqë në këtë periudhë shumë të rëndësishme historike të saj, Kosova ishte ajo që këtyre studjesve të vyeshëm u interesonte dhe meqë njëri nga profesorët e këtushëm ditë më parë ishte takuar me veprimtarin kosovar, atëherë kjo e shtunë i ishte kushtuar Kosovës dhe këta studjues, plot tri orë i kanë kaluar me Engjëll Koliqin, nga i cili kanë mësuar shumë gjëra interessante për Kosovën dhe rreth Kosovës - siç thonë ata vetë - ose nuk i kanë ditur fare, ose i kanë ditur gabimisht, varësisht nga burimi i tyre, që mjerisht ka qenë nga Beogradi, ose nga diplomacia botërore, e rjepur dhe e kërrusur udhëkryqeve të intereseve.

Engjëll Koliqi, në universitetin FUMEC

Profesori i pedagogjisë - Engjëll Koliqi, i cili është i njohur edhe si gazetar i devotshëm dhe shumë i besueshëm në mbarë kombin e tij, por edhe në botë, e tash po ecë shumë sigurtë dhe me plot suksese edhe në karrierën e tij të shkrimtarit, duke ligjëruar në këtë temë, shumë delikate, ka bërë një kalim turbo nëpër historinë mbi 3000 vjeçare të vendit dhe të popullit të tij, duke sjellë argumente historike nga periudhat shekullore të pushtimeve - nga romakët, nga turqit otomanë dhe nga serbët. Ai u ka parashtruar studjuesve të interesuar për këtë çështje shumë argumente historike të së drejtës ndërkombëtare e deri te terrori në shkallë genocidi, që Serbia ka ushtruar në luftën e fundit në Kosovë, ku bota përfundimisht e ka parë realitetin me sytë e vet dhe kanë filluar shumë ndryshime, që në kuadër të kësaj të drejte, këto ditë pritet edhe përcaktimi përfundimtar i statusit të Kosovës, si një shtet demokratik, me respektimin dhe trajtimin e barabartë të të gjithë banorëve të saj dhe me respektimin e rendit botëror. Ai i ka bindë studjuesit e së drejtës ndërkombëtare, se nuk është zgjidhje plotësisht e drejtë njohja e shtetësisë së Kosovës, e cila është vetëm një krahinë shqiptare, e ndarë padrejtësisht dhe me ushtrim dhune nga trungu shqiptar, por duke respektuar rendin botëror, të përcaktuar nga diplomacia e bashkësisë ndërkombëtare - ka thënë - duhet të kënaqemi edhe me këtë.

Engjëll Koliqi, foto me pjesëmarrësit

Mbasi ka mbaruar ligjëratën, Z. Koliqi është përgjigjur në pyetjet e shumta të të pranishmëve, të cilët kanë pranuar publikisht se kanë ditur pak nga realiteti kosovar, madje edhe atë që e kanë ditur e kanë marrë nga burime jo të dorës së pare - ose nga Beogradi, ose nga qarqe të ndryshme të diplomacisë ndërkombëtare, që në rropatjet udhëkryqeve të shumta botërore, ende vazhdon frymëzënë, e rjepur dhe e kërrusur, në paaftësinë e gjetjes së rrugëdaljeve, që do të shpienin në një paqe të qëndrueshme mbi tërë rruzullin dhe që njerëzimit do t'i garantonin lirinë e merituar. Profesorët e pranishëm i kanë kërkuar ligjëruesit kosovar mundësinë e një ligjërate para një grupi të madh studentësh, në amfiteatrin e madh të universoitetit, kërkesë kjo e pranuar me kënaqësi nga Engjëlli. Ndërkaq për një takim ekspertësh të së drejtës ndërkombëtare nga vende të ndryshme të botës, me ç'rast analistët akademikë do të merren me çështje aktuale të kësaj lëmie, është hedhë idea e përfaqësimit edhe të Kosovës, me një shkencëtar të kësaj fushe. Mbas konsukltimeve me veprimtarin kosovar, është vendosur që për këtë takim të shtatorit, nga Kosova të ftohet Akademik Esat Stavileci.

Engjëll Koliqi, foto me pjesëmarrësit