Ndoci, suksesi i heshtur në Helsinki

Frederik Ndoci zhvilloi dje provën e dytë në skenën e Festivalit Evropian në Helsinki. Vlerësohet pozitivisht performanca shqiptare

Duket se erëra të mbara po fryjnë për këngën shqiptare të Eurosong. Pas dy provash në skenën e Hartwall-it, vlerësimet për këngën e kënduar nga Frederik Ndoci janë mjaft të mira. Vlerësohet në veçanti vokali i këngëtarit, por edhe atmosfera emocionale që krijon grupi shqiptar prej 6 vetësh. Spektatorët kanë qenë të pakët gjatë interpretimit të shqiptarëve dhe interesimi i mediave i vakët, por pavarësisht kësaj, në faqen zyrtare të Festivalit Evropian Helsinki 2007 (www.eurovision.tv) dhe në një prej faqeve jo zyrtare më serioze që ndjekin festivalin (www.esctoday.com), kënga qëndron e sigurt në llojin e vet. Mësohet se Frederik Ndoci realizoi dje provën e tij të dytë në skenën e Evropianit. "Pavarësisht mungesës së spektatorëve performanca e tij vazhdon të jetë profesionale.

Ndoci solli një performancë të konsoliduar të këngës "Hear my plea" dhe vokalisht nuk ka ç'ti përmirësosh më tej. Artistët u paraqitën sërish me rroba të zakonshme dhe ende nuk është e qartë se cili do të jetë look-u i tyre të enjten. Një blu e lehtë si një lumë lotësh sillet rreth shqiptarëve, kalon nën këmbët e Frederikut teksa ai këndon. Edhe një herë të gjithë artistët në skenë realizojnë një performancë emocionale, sidomos kur kamera lëviz ngadalë dhe në mënyrë tragjike rreth tyre. Vokalistja në veçanti ia vlen të shihet, pasi sjell një interpretim tepër sensual, gati të papeshë, në pjesët e pakënduara në fillim të këngës", - shkruan gazetari Richard Wet –Soley për Esctoday.com.

"Shqipëria i zhvilloi provat në një arenë të madhe bosh, pasi shumica e njerëzve e lanë sallën pas performancës holandeze, kështu që reagimi i audiencës nuk ekzistoi fare, duke kursyer britmat e forta dhe "Bravot" pas interpretimit. Pavarësisht mungesës së dukshme të interesit në "lagjen" e gazetarëve, prezantimi i përgjithshëm është një nga më të mirët në zhanrin e tij", - vazhdon ai. I njëjti gazetar përcolli edhe provën e parë të shqiptarëve në datën 3 maj, një ditë pas mbërritjes së tyre në arenën e evropianit. Ai shpreson që pas "dështimit të një viti më parë në skenën e Athinës", Shqipëria të mund të hyjë në finale. Mësohet që Frederiku mbante veshur një xhaketë blu dhe në skenë qëndronte në qendër të grupit prej 6 vetash. Tre vokalistët pas tij, Aida në të djathtë dhe violinistja Joana Kaimi në të majtë.

"Frederiku, i cili ngjan si një djalë i ri në skenë, ndryshe nga ç'tregon videoja promovuese, duket qartë se këndon me pasion dhe ngjan se me të vërtetë ndin dhimbjen dhe dëshpërimin që ofron teksti i këngës. Artisti duket se është një mjeshtër në zhanrin e tij, në balada. Arrin të kontrollojë me zërin e tij (që e ka me tepri) frazat e gjata dhe të ngadalta". Duket se në një mendje me gazetarin e "Esctoday" ka qenë edhe ai i faqes zyrtare të festivalit, sa i përket anës emocionale dhe përjetimit të këngës nga ana e Ndocit. Sigurisht të njohur me karrierën e Ndocit dhe jetën e tij, nuk ka qenë e vështirë të zbulohet që në një farë mënyre teksti është përjetuar realisht nga këngëtari. Në Eurovision. tv vlerësohet pozitivisht prova e Ndocit dhe vihet në dukje performanca e thjeshtë, pa lëvizje, që gjithsesi pritej, duke marrë parasysh frymën e këngës.

"Prova shqiptare shkoi mirë që në fillim. Edhe pse Frederik Ndoci kishte pak ftohtë, kjo nuk ndikoi në cilësinë e të kënduarit të tij. Ashtu si edhe pritej nga një baladë melankolike si kënga e tij "Hear my plea", performanca skenike ishte pa lëvizje dhe efekte skenike. E gjithë skena ishte mbuluar nga një blu e errët, me një qiell të yjëzuar pas, teksa këngëtarët shoqërues, mbështesnin baladën e Frederikut së bashku me gruan e tij, Aida. Një violiniste i shton pak atmosferën këngës". Frederik Ndoci me këngën "Hear my plea" apo "Balada e gurit" në variantin shqip, një krijim i dyshes Adrian Hila- Pandi Laço, ngjitet në skenën e Evropianit në natën gjysmëfinale në datën 10 maj. Pas votimit të të gjitha vendeve pjesëmarrëse në festival, do të mësojmë nëse këtë herë do të kemi një fat më të mirë se ai i një viti më parë në Athinë me Luiz Ejllin, apo edhe me Leidina Çelon në Kiev.

Konferenca: "Për të prekur zemrat e shikuesve"

Në ditën e dytë të qëndrimit në Helsinki grupi shqiptar ka dhënë një konferencëpër shtyp, ku i është përgjigjur interesit të gazetarëve. I emocionuar prej faktit që përfaqëson Shqipërinë në Eurosong, Frederik Ndoci tregon për mediat se kishte nisur të shihte Festivalin Evropian të Këngës që prej vitit 1972, kur Vicky Leandros fiton me këngën "Apres toi". Gjithashtu thotë se është detyruar ta shohë në një stacion italian, pasi në atë kohë ky festival ishte i ndaluar të transmetohej në Shqipëri. Sipas faqes zyrtare të festivalit, Ndoci nuk ka mundur të mos përmendë të kaluarën e vështirë në Shqipëri.