Një këngë për Aurelën

-- nga Pierre-Pandeli Simsia

Aurela Gaçe, ylli shqiptar i muzikës vazhdon të fluturojë në majat më të larta të suksesit të saj muzikor. E vendosur prej disa vitesh në Nju Jork, ShBA ajo është këngëtarja më e pëlqyer dhe më e kërkuara në aktivitetet e ndryshme familiare dhe ato kombëtare që zhvillon Komuniteti Shqiptar në ShBA.
Energjitë, zëri, timbri, kthjelltësia e zërit të saj vazhdojnë të jenë si përherë shpërrthyese në lartësitë maksimale.

Me zërin e saj, me këngën në buzë, Aurela të shëtit dhe na sjell pranë mbarë shqiptarinë; Ulqinin, Trevat e ndryshme Kosovare, Tepelenën, Gjirokastrën, Dibrën, Kukësin, Beratin, Çamërinë, Krujën, Elbasanin, Tropojën, ..., polifoninë labe, këngët e bukura popullore vlonjate dhe muzikën e lehtë, që janë "ilaçi" i saj. Si një artiste e lindur për këngë, Aurela Gaçe nuk e ka të vështirë të interpretojë aq mjeshtërisht edhe këngët e huaja, veçanërisht ato amerikane.

Ajo këtë e vërtetoi më së miri në koncertin e dhënë kohët e fundit. Të mbledhur në një sallë të madhe dhe luksoze, ku gjysma e spektatorëve ishin të huaj, mjeshtrja e këngës me interpretimin e saj dinjitoz e ngriti sallën, spektatorin peshë në këmbë.
Duartrokitje të pandërprera, kënaqësi, lumturi, emocione gëzimi, përqafime... këto ishin pjesët e atij ambienti të gëzueshëm, ndërsa këngëtarja Gaçe e bërë njësh me këngën, vazhdonte të këndonte e të këndonte pa ndërprerje.

O Zot! Lum ata që e kanë atë fat të madh të jenë pjesëmarrës në koncerte të tilla të këngëtares Aurela Gaçe dhe Grupit Muzikor ALBA me instrumentistët profesionistë Edi Xhani, Ilir Dangëllia, Sokol Asllani, Artan Kushi.
Ne shqiptarët që e njohim Aurelën dhe që e kemi parë dhe dëgjuar me dhjetëra herë, u elektrizuam nga kënaqësia që po na jepte këngëtarja jonë e madhe, superylli Gaçe, ndërsa të huajt...? Ata u befasuan...! Nuk ka gjë më të bukur, mahnitëse dhe mbresëlënëse të paharuar, pse jo edhe mburrje për gjithë shqiptarët e pranishëm që ndodheshin atje, kur Aurela jonë e madhe me mikrofonin në dorë interpretonte mjeshtërisht këngët e yjeve amerikanë si Mariah Carey, Janet Jackson, Tina Turner, ... dhe spektatorët amerikanë iu afruan, ndërsa ajo vazhdonte të këndonte, e përqafuan, duke thënë fjalët: "Oh my God, Oh my God" "Yeeeeeeh! Yeeeeh!", "Thank You very much", "She is excellent"...

Të gjithë spektatorët të gëzuar, të emocionuar, jetonin në një botë tjetër të mahnitëshme në ato çaste; bashkë me këngëtaren ata fluturonin në qiellin e shtatë të lumturisë.
Ai koncert erdhi pas koncertit tjetër të suksesshëm, ku superylli shqiptar i këngës Aurela Gaçe u mirëprit dhe u vlerësua nga publiku në interpretimet e këngëve të dy divave shqiptare të këngës, Vaçe Zela dhe Nexhmije Pagarusha. Dhe ja, interpretimi tjetër me këngët e yjeve botërorë të këngës. Sukseset e superyllit shqiptar Aurela Gaçe nuk njohin kufij.

E ardhur në ShBA. nga Shqipëria, ku edhe atje sukseset e kanë ndjekur nga pas, udha për Aurela Gaçen ka qënë përherë e hapur që ajo të përfaqësojë Shqipërinë në Festivalin Evropian dhe të gjithë jemi të bindur se këngëtarja nuk do ta zhgënjejë publikun dhe jurinë, pse jo, të na i sjellë eurovizionin edhe në Shqipëri. Që të realizohet kjo, duhet të krijohet një këngë për Aurelën; organizatorët duhet të zhvishen nga praktikat e viteve të kaluara të dështuara, duke përzgjedhur këngën fituese të Festivalit Kombëtar të Dhjetorit të jetë edhe kënga përfaqësuese e Shqipërisë në Eurovizion.

Sepse u ndoq kjo praktikë e vjetër edhe vitin e kaluar, ku një superyll tjetër shqiptar, Frederik Ndoci edhe pse me po të njëjtin zë brilant dhe shpërrthyes si përherë, nuk pati suksesin e pritshëm, sepse ndoshta i duhej dhënë një këngë tjetër për ta kënduar në atë Festival Evropian. Edhe ndonjë këngë nga albumet e tij të kohëve të fundit, që kanë pasur sukses në Amerikë dhe në Evropë, po të ishte pranuar, sigurisht, Frederiku do të na i sillte festivalin në Shqipëri.