In memoriam: ...Dhe fjala ngrin në fyt

Lajmi i zi dhe krejt i papritur, trondit çdo njeri kudo qoftë ai, por lajmi tragjik për vdekjen e një miku e kolegu të dashur e të respektuar trondit mikun e kolegun edhe më shumë. Dhembja dhe tronditja bëhet edhe më e madhe atëherë kur një lajm të tillë e merr papritur e pakujtuar diku larg atdheut... Eh... Ofshama e dhembjes është e rëndë edhe për mua këtu në mërgim.

Dhe për një çast fjala ngrin në fyt. Dhembja seç e ngulfat fjalën. E fjala, për një moment, ndjehet aqë e pafuqishme që ta përshkruajë dhembjen për humbjen e një kolegu, për humbjen e një miku, për humbjen e një krijuesi dhe shkrimtari të dashur siç ishte Iljaz Prokshi.

Por krenaria që e njohëm dhe e patëm një mik e koleg të tillë sikur e çliron fjalën dhe e mund dhembjen. Po. Jemi shumë krenar për fisnikrinë, bujarinë dhe gjitha virtytet e tij prej njeriu e krijuesi. Me veprën e Iljazit krenohet brezi ynë dhe do të krenohen brezat që do të vijnë, sepse vepra dhe virtytet e tij i takojnë të sotmës dhe të ardhmës sonë.

I ndjeri, Iliaz Prokshi me urtësi, mirësi, fisnikëri e dashuri prej njeriu e krijuesi arriti të lë pas vetës një veprimtari të begatshme, të çmuar dhe të dashur letrare e njerëzore. Krahas veprimtarisë së tij të bujshme atdhetare, kulturore e intelektuale, arriti që letërsisë sonë t’ia fali një sër veprash me poezi, tregime e romane. Vepra këto, që çmohen, lexohen e rilexohen, dhe kështu emrin e tij e ndrisin vazhdimisht dhe e bëjnë të paharruar. Iljazin do ta kujtojmë gjithmonë sa të jetojmë me librat: “Libri i kujtimeve”, “Pikë e bardhë ëndrre”, “Daullet e natës”, “Satana në ferr”, ”Fytyrë në pergamenë”, “Vdekja në ëndërr”, “Magjia e mjegullës”, "Fundi i Zemërimit”, “Psalm arbëror”, "Vajza e trëndafilave”, “Dashuri në Labirinth”, etj. Libra këto që vetë autorit i bëjnë një vend të çmuar në mesin e krijuesëve tanë dhe me vlerat që sjellin e begatojnë opusin e letërsisë sonë në përgjithësi.

Kështu kujtimi për të dhe vepra e tij do të nderohen përherë dhe s’do të harrohen kurrë.

Të ndjerit, Iljaz Prokshit, i cili vetëm fizikisht s’është më me ne, i qoftë i lehtë dheu i Kosovës! Ndërsa, ngushëllimet e mia më të sinqerta me këtë rast ua drejtoj: familjes dhe të afërmëve të tij, miqëve, kolegëve e dashamirëve të tij të shumtë kudo e ngado qofshin ata!

Suedi, 1 maj 2007
Rizah Sheqiri, shkrimtar (anëtar i Shoqatës së Shkrimtarëve të Suedisë)