Çmimi Ndërkombëtar për Gra të Guximshme, e fiton edhe një kosovare Valdete Idrizi

-- nga Beqir SINA, Nju Jork, SHBA

Çmimi Ndërkombëtar për Gra të Guximshme është i vetmi vlerësim që jep Departamenti i Shtetit për gra që kanë marrë role udhëheqëse në botë. Ky vlerësim shihet si një mundësi unike për diplomacinë transformuese për çështjet e gruas.

WASHINGTON D.C: Në një ceremoni zhvilluar në mjediset e Departamentit të Shtetit, Sekretarja amerikane e Shtetit Kondolisa Rajs dhe Nënsekretarja e Shtetit për Demokraci dhe Çështje Globale, Paula Dobriansky, shënuan dy ditë më pasë datës, 8 mars Ditën Ndërkombëtare të Gruas për vitin 2008 me ndarjen e Çmimit, të 11-të Ndërkombëtar për Gra të Guximshme. Çmimi Ndërkombëtar për Gra të Guximshme është i vetmi vlerësim që jep Departamenti i Shtetit për gra që kanë marrë role udhëheqëse në botë. Ky vlerësim shihet si një mundësi unike për diplomacinë transformuese për çështjet e gruas.

Ky çmim prestigjoz ndahet çdo vitë në të njëjtën ditë, dhe ka një përzgjedhje selektive e cila bëhet nga ambasadat amerikane kryq e tërthorë botës. Këtë vitë kandidate u zgjodhën 97 gra nga e gjithë bota. Me Çmimin Ndërkombëtar për Gra të Guximshme, këtë vitë u nderuan gra nga Kosova, Afganistani, Fixhi, Iraku, Pakistani, Autoriteti Palestinez, Paraguai dhe Somalia, për rolin që kanë luajtur për transformimin e shoqërive të tyre dhe ndikimin frymëzues në komunitetin ndërkombëtar. Gratë fituese për këtë vitë janë: Valdete Idrizi (Kosova),Suraya Pakzad (Afghanistan), Virisila Buadromo (Fiji),Dr. Eaman Al-Gobory (Irak), Nibal Thawabteh (Palestinian Authority), Dr. Begum Jan (Pakistan), Cynthia Bendlin (Paraguay),Farhiyo Farah Ibrahim (Somalia)

Për herë të parë këtë çmim e fitojë edhe Valdete Idrizi, grua shqiptare nga Kosova. Ajo është një nga gratë që u nderuan sot me këtë çmim, vetë e shpërngulur nga konflikti, është aktive në zonat me banorë serbë në Kosovën veriore ku drejton projekte për gra dhe të rinj me synimin për të ripajtuar dhe për të sjellë paqen ndërmjet komuniteteve të ndryshme etnike. Valdete Idrizi, kryetare e organizatës CBM nga Mitrovica, ka prezantuar në Prishtinë aktivitetet e kësaj organizate, për të cilën ajo thotë se ka fituar respektin dhe besueshmërinë e komuniteteve duke punuar në fusha të ndryshme. Valdete Idrizi, është njëra nga liderët e organizatës joqeveritare “Community Building Mitrovica - CBM”, në një intervistë të sajë (2 qershorë 2005) për Portalin e OneWorld-Evropa Juglindore, ajo ka treguar për mundësitë që kanë OJQ-të në këtë rajon përderisa për situatën në Mitrovicë, ajo në mes tjerash thotë është duke u përmirësuar dhe normalizuar.

Valdete Idrizi, citohet të ketë thënë:" Duhet shumë të mundohemi dhe të jemi këmbëngulës nëse me të vërtetë dëshirojmë përkrahje nga autoritetet lokale dhe ndërkombëtare, por edhe nga qytetarët. Është me të vërtetë vështirë dhe mund të them se edhe sfida më e madhe për ne si shoqëri civile që t’i stimulojmë qytetarët të nxisin ndonjë iniciativë që ka të bëjë me lagjen apo qytetin e tyre. Ndoshta, kjo është pasojë e të kaluarës, që gjithmonë jemi mësuar që “dikush” të vendosë për fatin e lagjes apo qytetit tonë. Ndoshta, është edhe se njerëzit janë lodhur nga manipulimet që bëhen me ta, veç mund të them se gjatë punës sonë në terren, po ballafaqohemi me këtë problematikë.

Lidhur me pyetjen se Çfarë duhet bërë shoqëria civile kosovare për të qenë sa më afër nevojave të përfituesve? fituesja e çmimit Çmimi Ndërkombëtar për Gra të Guximshme, për vitin 2008, gruaja nga Kosova, Valdete Idrizi, ka thënë se" Duhet të jetë shumë afër përfituesve, duhet t’i dëgjojë ata, t’i informojë ata për zhvillimet nëse është nevoja, të fitojë besimin e duhur, ta nxisë bashkëpunimin mes tyre dhe komuniteteve tjera, bashkëpunimin me autoritet lokale, përkrahjen e tyre në forma te ndryshme, në mënyrë që mos të jenë pastaj “të papërgatitur dhe të befasuar”. Nëse jemi afër tyre dhe me ta, atëherë do të dimë edhe në çfarë gjendje janë dhe në çfarë kahje mund të rrjedhin gjërat.