Ngadhnjimi i jetës mbi vdekjen

-- nga Engjëll KOLIQI

Jezusi tha: "Unë jam Ringjallja dhe Jeta: kush beson në mua, edhe nëse vdes, do të jetoj. Edhe kush jeton edhe beson në mua, nuk do të vdesë kurrë"
(Gjoni - 11.25-26).

Jezu Krishti ngjallet dhe ngjitet në qiell, te Ati.
Ngadhnjen jeta mbi vdekjen
Ngadhnjen mirësia mbi të keqen

Përfundimisht kremtet tona popullore – fetare, tradicionale e familjare, i bëjmë në shtetin tonë të pavarur dhe të njohur botërisht. Pra, përfundimisht po përjetojmë edhe një ringjallje kombëtare, për t'i përmbushur gradualisht të gjitha aspiratat tona kombëtare – të natyrshme e të ligjshme. Prandaj, zemra më thotë që urimet për Pashkët 2008 t'ua drejtoj të gjithë shqiptarëve, të besimit të krishterë dhe të besimit mysliman, me bindjen se të gjithë i gëzohen faktit se e para festë e madhe fetare po kremtohet në shtetin e pavarur të Kosovës.

Në kishën famullitare të Shën Margaritës Maria Alakokue, Flamuri i Republikës së Kosovës bekohet në altar, gjatë Meshës Solemne të Mesnatës, Dr. Vera Lúcia Alves Neves shpjegon simbolikën e Flamurit

Belo Horizonte, 22 mars 2008 – Të bukurin mesazh të optimizmit të Pashkëve, sivjet e shkruaj larg atdheut, por me plot gëzim e lumturi, sepse janë Pashkët e Para në Republikën e Kosovës dhe sepse kjo largësi e imja në këtë kremte të madhe është vetëm një largësi fizike dhe një largësi në shërbim të vendlindjes sime.

Këto ditë të Javës së Madhe, Kisha Katolike Univerzale përkujton mundimet e Jezu Krishtit – siç thuhet në shkrimet e shenjta – për ta shpëtuar njerëzimin nga mëkati i rrjedhshëm, që doli nga Adami dhe Eva. Siç shkruajnë ungjilltarët (Luka, Mateu, Gjoni e Marku), sipas parashikimit të profetëve Krishti (zot e njeri) kishte pranuar mundimet deri me vdekje në kryq, për ta shpëtuar njerëzimin nga mëkati. Në të tretën ditë pas vdekjes – thotë dogma biblike, pra në Ditën e Pashkëve, Ai ishte ringjallur, duke simbolizuar kështu ngadhnjimin e jetës mbi vdekjen, ngadhnjimin e dritës mbi errësirën dhe fitoren e mirësisë ndaj të keqes. Këto ditë përkujtimore të mundimeve, të vdekjes dhe të ringjalljes së Jezu Krishtit, në Selinë e Shenjtë, si zakonisht kanë filluar të dielën e kaluar, pra të Dielën e Larit. Të Enjten e Madhe Papa Benedikti XVI ua ka larë këmbët 12 besimtarëve të zgjedhur, sikurse Krishti që ua kishte larë apostujve, me simbolikën për pastrimin e njerëzimit nga mëkatet dhe pajtimin me Zotin. Sikurse riti i Darkës së Mbrame, të Enjten e Madhe, poashtu edhe riti i Udhës së Kryqit, të Premten e Madhe në amfiteatrin antik të Romës "Colosseo" janë udhëhequr nga Ati i Shenjtë Benedikti XVI, i cili do t'u prij edhe Meshës së Mesnatës të shtunën dhe asaj solemne të së Dielës së Pashkëve, me ç'rast në mesditë do e kumtojë Mesazhin e Ringjalljes, megjithë Bekimi Apostullik "Urbi et Orbi".

E. Koliqi, duke folur për Republikën e Kosovës, me famullitarin
José Feliciano da Costa Simões në Ouro Preto

Në ceremonitë e Meshës së Mesnatës, me rindezjen e qiriut mbi zjarr, do të shpallet ringjallja e Krishtit, si ngadhnjim i jetës mbi vdekjen. Me dritën e qiriut do të shpallet ngadhnjimi i dritës mbi errësirën dhe fitorja e mirësisë mbi të keqen. Porosia e gjithëhershme e Atit të Shenjt, me rastin e Pashkëve është: - Me kulturë të lartë jete dhe me dashuri ta mundim logjikëne vdekjes dhe urrejtjen dhe t'ia rikthejmë njerëzimit mbarë paqen dhe lumturinë! Vetëm me dashuri të mirëfilltë ndaj njëri-tjetrit do të mund t'u garantojmë një ardhmëri të dëshirueshme dhe të vlefshme pasardhësve – porositë njerëzimin Papa, në Mesazhin e Optimizmit të Pashkëve, që të Dielen e ardhshme do t'ia drejtojë njerëzimit mbarë – besimtarë e jobesimtarë, anekënd botës.

Afresk kishtar i Jezu Krishtit

Mbasi kishte vdekur, i kryqëzuar në kryq, Zefi pre Arimatesë e kishte blerë varrin dhe – me leje të pushtetarëve lokalë, të cilët edhe kishin dekretuar kryqëzimin e Tij, e kishte varrosur. Në agun e së dielës, një grup grashë të devotshme kishin shkuar për t'u lutur pranë varrit të Jezu Krishtit. Grave të devotshme, që në mëngjesin e së Dielës së Pashkëve kishin shkuar të luten pranë varrit të Tij, zëri i Zotit u kishte thënë: "Pse e kërkoni të gjallin ndër të vdekurit? Ai s'është këtu! U ngjall!" (Luka, 24, 5-6). "U ngjall ashtu siç pat thënë" (Mateu, 28,6). Lum kush beson pa parë u kishte thënë Ai vetë apostujve në Ditën e Rrëshajve, duke e thittë Shën Tomën, i cili kishte shprehur mosbesim ndaj ringjalljes, që t'i vëjë gishtërinjtë në varrët e Tij, shenjat e të cilave vëreheshin ende, siç shkruajnë ungjilltarët.

Le ta ndërlidhim këtë simbolikë edhe me historinë, me fatin dhe me ardhmërinë e kombit tonë, që vit pas viti, shekull pas shekulli – brez pas brezi, ka përjetuar shtypje me dhunë e me urrejtje, shumë mëkate mbi kurrize mbi supe, shumë padrejtësi... Le të marshojmë pas dritës së shpresës drejt ringjalljes sonë kombëtare dhe drejt një jete të plotkuptimshme, të liruar nga mëkatet, nga vuajtjet, nga dhuna, nga shtypjet, nga urrejtja dhe le të jetojmë deri në amshim, megjithë kohën dhe historinë mbushur me drejtësi, me liri, me dashuri, me respekt, me solidaritet – që sot e deri në amshim. T'i lutemi Zotit të përbashkët, secili në mënyrën e vet dhe me ritet e fesë së tij, që edhe kombi ynë të përjetojë një ringjallje të vërtetë, por le t'i lutemi që ringjallja të vijë për njerëzimin mbarë dhe që në vend të shekujve të përgjakshëm, historisë le t'i vijnë shekuj me lule e me bukuri ngjyrash të ylberit!!! Sidomos këtë vit na takon të jemi shembull i shkëlqyeshëm për botën e civilizuar, sepse kombi ynë tashmë ka shijuar Kremten Madhështore të Pavarësisë së Kosovës, një nga aspiratat tona të natyrshme kombëtare, si fazë kalimtare drejt bashkimit mbarëkombëtar. Me këtë kremte të madhe dhe dinjitoze, uj kemi treguar të gjitha kombeve të botës dhe të gjitha qendrave arbitrare të bashkësisë ndërkombëtare, se ne dijmë të kremtojmë dhe ta organizojmë jetën me dinjitet. Duke mos njohur urrejtjen, le të jemi shembull tipik i kultivimit dhe dhurimit të dashurisë së mirëfilltë njerëzore.

Përfundimisht kremtet tona popullore – fetare, tradicionale e familjare, i bëjmë në shtetin tonë të pavarur dhe të njohur botërisht. Pra, përfundimisht po përjetojmë edhe një ringjallje kombëtare, për t'i përmbushur gradualisht të gjitha aspiratat tona kombëtare – të natyrshme e të ligjshme. Prandaj, zemra më thotë që urimet për Pashkët 2008 t'ua drejtoj të gjithë shqiptarëve, të besimit të krishterë dhe të besimit mysliman, me bindjen se të gjithë i gëzohen faktit se e para festë e madhe fetare po kremtohet në shtetin e pavarur të Kosovës.

ME RASTIN E KREMTËS SË PASHKËVE:

Në kishat braziliane lutje dhe bekime speciale për Republikën dhe Popullin e Kosovës

-- nga Caio WERNECK

Flamuri i Republikës së Kosovës bekohet në altar, gjatë Meshës së Mesnatës së Pashkëve

Veprimtari e shkrimtari i mirënjohur kosovar – Engjëll Koliqi, si një ambasador i mirëfilltë, po depërton në të gjitha shtresat shoqërore të vendit tonë, me kërkesat për përkrahjen e vendit dhe të popullit të tij, në fazën më të rëndësishme të historisë së atij vendi, që dikur ishte Dardania e njohur. Ai në Javën e Shenjtë (Java e Madhe – siç thuhet në Kosovë) dhe në kremtimin solemn të Pashkëve, në vendin tonë siguroi lutje dhe bekime, për vendin e tij, nga besimtarët dhe klerikët – deri te Kardinali Ynë – Lartmadhëria e Tij Serafim Fernandes de Araújo.

Belo Horizonte, 24 mars 2008 – Mbas hapjes së mrekullueshme të konferencës ndërkombëtare, kushtuar luftës, organizuar nga Universiteti Papëror Katolik i Minas Geraisit, në Belo Horizonte, veprimtati i denjë dhe i devotshëm i Kosovës Dardane – Engjëll Koliqi, edhe në kremtimin dhe ritet e Javës së Shenjtë dhe të Pashkëve, nëpër kishat tona u fut me Flamurin e Republikës së Kosovës dhe denjësisht "nxori" lutje e bekime speciale për Shtetin dhe Popullin e Kosovës, nga besimtarët dhe klerikët tanë, përfshirë edhe Kardinalin e Minas Geraisit – Lartmadhërinë e Tij Serafim Fernandes de Araújo.

Engjëll Koliqi, gjatë ritit të Darkës së Fundit, Të Enjtën e Madhe,
në Kishën e Shën Pjetrit

Të Enjtën e Madhe, Z. Koliqi ishte i ftuar special në ceremoninë e Darkës së Fundit të Jezu Krishtit me apostujt, në Kishën e Shën Pjetrit në Belo Horizonte, ku famullitari At José Carlos Vieira Trópia i ka ftuar besimtarët që të lusin për përparimin e shpejtë të gjithëmbarshëm të shtetit më të ri në botë – Republikës së Kosovës. Të gjithë kanë lutur dhe kanë përshëndetur përfaqësuesin kosovar në mesin e tyre – veprimtarin e devotshëm Engjëll Koliqin, i cili i ka falënderuar në emër të mbarë popullit të tij, duke siguruar se Kosova do të jetë një shtet shembull i demokracisë së mirëfilltë dhe i tolerancës mes popujve dhe besimeve të ndryshme. Qindëra besimtarë, mbas falënderimit të Tij, në shenjë solidarizimi kanë duartrokitur frenetikisht për Republikën e Kosovës.

At José Carlos Vieira Trópia përqafon z. Koliqin,
duke i ururar Pavarësinë e Republikës së Kosovës

Të Premten e Madhe, i shoqëruar nga Profesoresha Jonë e mirënjohur dhe e nderuar – Dr Vera Lúcia Alves Neves, me ftesë të Kardinalit të Minas Geraisit - Lartmadhërisë e Tij Serafim Fernandes de Araújo, Z. Koliqi ishte pjesëmarrës i ceremonisë "Shtatë Fjalët e Fundit të Jezusit", në kishën katedrale të qytetit tonë historik, me status special nën mbrojtjen e UNESCO-s, për pasurinë kulturore botërore – Ouro Preto (dikur kryeqytet i Minas Geraisit, rreth 90 km në juglindje të Belo Horizontes. Në Katedralen e Zojës Sonë të Shtyllës, ku i shoqëruar nga famullitari – Kanoniku José Feliciano da Costa Simões, Kardinali Araújo ka përshëndetur publikisht Engjëll Koliqin dhe bashkë me besimtarët ka lutur Zotin, që t'i sjellë bekime dhe mbarësi Republikës së Kosovës – vendlindjes së Të Lumes Nënë Tereza dhe mbarë popullit shqiptar. Ai ka paralajmëruar se së shpejti do të shkojë për një vizitë në Kosovë.

E. Koliqi, të Premten e Madhe, me Eminencën e Tij
Kardinal Serafim Fernandes de Araújo

Në Meshën Solemne të Ngjalljes së Jezu Krishtit (në Meshën e Mesnatës), në Famullinë e Shën Margaritës Maria Alakokue (Santa Margarida Maria Alacoque) ambasadori faktik i Kosovës në vendin tonë (edhepse atij nuk i pëlqen cilësimi ambasador), ishte i ftuar special. At Tiago dhe famullitari – At Philippe Jacques Barrucand e ftuan Z. Koliqin në altar. Mbasi një zonjë lexoi një lutje speciale për popullin e Kosovës, ia dha fjalën Z. Engjëll, i cili tha se aty ku ishte Dardania Antike, me mbi 110 mijë kilometra katrorë, tashmë përfundimisht u bë Republika e Kosovës me rreth 11 mijë kilometra katrorë – një shtet i vogël, por shumë domethënës për paqen e qëndrueshme në Ballkan dhe shembull tipik i demokracisë dhe drejtësisë së mirëfilltë njerëzore në botë. Me shembullin e bijës së Tokës së Kosovës, që mbarë bota e thirri Nënë – Nënë Terezës – ka thënë Ai – populli i Kosovës ka gjetë fuqinë t'i falë të gjitha ata që e kanë shtypur dhe martirizuar deri në gjenocid, por nuk do të lejojë kurrë më dhunë as gjakderdhje mbi tokën e vet, që tashmë është e paprekshme dhe e vulosur, edhe me hartën në flamur.

Engjëlli duke ndezë qiriun (Dritën e Krishtit), në Meshën e Mesnatës