Kryekallësi dhe ndërkallësit e frikës

-- nga Kiço Blushi, Gazeta Shqiptare, 24 dhjetor 2008

Të frikësohesh në demokraci besoj se është me keq se të kesh frikë në diktaturë. T’u kallësh datën qytetarëve të tu në një sistem demokratik, kur ke pushtet në duar, është ku e ku më zi se të jesh një diktator, që shpall: ligji jam unë! Nuk paska gjë më të shëmtuar

... se një demokraci që ngrihet mbi frikën e qytetarëve prej të zgjedhurve të vet! Një demokraci ku edhe ata që lipset të japin drejtësi kanë frikë, (prokurorët dhe gjykatësit) nuk mund të quhet demokraci! Pyetja është e thjeshtë: Kush ka mandat sot mbi krimin? I vetmi që ka mandat mbi krimin dhe antikrimin, që shpall fajtorë e shenjtorë, në këto 18 vjet, është, pa asnjë diskutim, Berisha! Është i vetmi qytetar, për shkak të imunitetit politik, që nuk ka pranuar të përgjigjet para organeve të Drejtësisë, jo vetëm për faje, por edhe për krime të rënda, si ajo e vrasjes së Hajdarit, si ajo e vitit 1997, për të mos përmendur djegien e Kryeministrisë më 1998, pas grushtit të shtetit! E ja pra, ky njeri tani po na ligjëron për “mandate të krimit” dhe për standarde të demokracisë! Ky do të pastrojë Shqipërinë shqiptare!

Të jesh spiun në demokraci është ndyrësi më e ndyrë se të jesh spiun i rekrutuar në diktaturë. Të ishe dje i përdorur, puthador, lapërdhar, servil, ndërsa sot, në demokraci, një njeri që fut kokën së pari në kapistallin e Berishës, pastaj të Nanos e përsëri të Berishës, kur të dy palët të kanë pas shkërbërë disa herë moralisht e publikisht, sigurisht është më e pafalshme! E pra këta “do të pastrojnë shoqërinë”, dmth. këta do ta bëjnë jetën tonë më të moralshme?! Të shpërdorosh besimin dhe fondet publike për pasurim të familjarëve të tu, të sajosh ligje për të shpëtuar veten dhe familjarët e tu nga ndëshkimi i nesërm, mos është ky një krim i falshëm dhe i pafajshëm në demokraci? Këta zorzopë që edhe kur kapen me presh në duar i thonë organeve të Drejtësisë se “po i sulmon politikisht”?

Në çdo diktaturë ka një sistem të tërë zinxhir që shërben për t’u kallur frikë qytetarëve, që këta të mbyllin gojën. Në majë të piramidës, natyrisht është kryekallësi, diktatori. Nuk janë pa faj edhe ndërkallësit, ata që përhapin frikën, ata që zbatojnë platformën e kryekallësit, ata që ndërkallin pafuqinë dhe dorëzimin pa kushte të qytetarëve të pafajshëm… Këtu, natyrisht hyjnë hetuesit, prokurorët, spiunët e paguar dhe sidomos ata “vullnetarë” të lagjeve e të zyrave, të cilët nga zelli për të bërë karrierë e shumëfishonin dhunën dhe frikën… Por, e njëjta gjë, mjerisht, ndodh edhe sot! Madje në mënyrë edhe më groteske. Mjafton të shohësh nëpër TV-ëra shpjegimet e ministrave të sotëm e të djeshëm të Drejtësisë! Mjafton të shohësh se si votojnë në rresht të përdorurit e sotëm të Berishës! Këta kanë frikë nga kryekallësi i frikës, nga Berisha, ndaj nuk duan t’ia dinë as për vërejtjet e SHBA-së! Sepse një sejmen katundi kujton se mbret absolut i botës është beu i katundit të vet!

Gjykatësit që kanë zbatuar ligjin, -për të cilin përgjegjës janë ligjvënësit e kohës,- nuk mund të futen në një thes me ata që e kanë tejkaluar ligjin për të kallur terror dhe frikë në shoqëri, që diktatura të mbijetonte. Ata që kanë tejkaluar ligjin janë ata që duhet të pastrohen! Një gjykatës apo hetues që ka tejkaluar për zell, për partishmëri, apo për paranojë ligjin, ky është kriminel! Ky lloj zyrtari duhet të cilësohet dëmsjellës edhe në demokraci! Sepse shoqëria duhet të mbrohet nga këta të përdorur e të keqpërdorur në të dy sistemet (aq më keq kur ata janë prokurorë e gjyqtarë!), nga ata që nuk pyesin për ligjet, po vetëm për urdhrin e shefit të madh! Të tillë ka pasur në diktaturë, të tillë ka me shumicë, mjerisht, edhe në këtë gjasme demokraci!

Por këtë dallim nuk e bën Ligji “i spiunëve” të Sali kryekallësit! Sepse politikës së sotme i nevojiten më së pari pikërisht të tillë juristë, gjyqtarë e prokurorë, që nuk zbatojnë Kushtetutën dhe Ligjin! Me të tillë juristë të përdorur kërkohet të instalohet “reforma” në Drejtësi! Edhe ligji për dosjet, edhe ai për prokurorinë synojnë të largojnë ata që zbatojnë Ligjin, ata që nuk i binden urdhrit të shefit të madh, i cili do apo nuk do, do të shkojë drejt hetimit!! Pra, projekt-ligji “i spiunëve” dhe “kriminelëve” nuk synon të pastrojë shoqërinë nga ata që e tejkaluan ligjin, që kryen krime, po nga ata që japin garanci se do të zbatojnë Ligjin! Po kallet frika në të tërë piramidën e Drejtësisë që nesër, një prokuror e një gjykatës që sot jep vendime të padrejta, në kundërshtim edhe me Kushtetutën, po në dobi të kryeministrit aktual, nesër të mos ndëshkohet, madje të jetë i nderuar! Të bëhet madje, si shpërblim, edhe ministër drejtësie, si edhe janë bërë, në jo pak raste! Kurse ai/ata që do të guxojnë të Zbatojnë Ligjin, qoftë edhe për Fazlliçin, ata “janë me dosje”!

Pra, qëllimi nuk është të mënjanohen “spiunët”, as “ata që tërhoqën zvarrë me zinxhirë” të pafajshmit, dmth. “kriminelët e diktaturës që kanë duart me gjak”, por të lihen në punë ata që pranojnë të tejkalojnë ligjin për devotshmëri, verbëri, apo karrierë! Sepse, vetëm me ndihmën e tyre mund të mbahen nën terror e nën frikë të pandërprerë prokurorët dhe gjykatësit e sotëm, ata që kanë çështje madhore në duar: Gërdecin, rrugën “patriotike” Durrës-Kukës, çështjen e të ndjerit Remzi Hoxha dhe natyrisht edhe Fazlliçin! Pra, qëllimi i këtij projekt-ligji synon të kallë frikën që ne të mendojmë se “Berishës nuk i del dot njeri përpara, se ai ta shtyp kokën”, po në radhë të parë të kallë frikë te gjykatësit dhe prokurorët, që kanë në duar fatin e tij, taborrin e klanin e tij qeveritar! Sepse, kur tromaksen njerëzit e drejtësisë, si të mos frikësohemi ne?

Kështu, nëse gjykatësi Sokol Tona nuk do të kishte dhënë atë vendim që dha për të pezulluar Prokurorinë nga hetimet për dy zyrtarët e lartë të Ministrisë së Transporteve, a nuk do të kishte dalë Berisha në Kuvend e ta demaskonte këtë gjykatës, meqë ky është i biri i ish-shefit të shtypit në Komitet Qendror? Përse nuk doli sivjet Fatmira Hajdari në ceremoninë përkujtimore që bëri Berisha, si çdo vit, para memorialit të të ndjerit Azem Hajdari, bri Saliut? Sepse edhe ajo, me sa duket, kishte frikë se mos opozita do të thoshte: ja, shikojeni, ajo është një gjyqtare politike, një vegël e Berishës! Pra, edhe gruaja e dëshmorit të demokracisë veproka nga frika… Kësisoj, veproi nga bindja apo nga frika zonja Hajdari kur dha vendimin e çuditshëm e të paprecedent për “dosjen Basha”? Por as për këtë nuk pipëtiu kurrkush ndër juristët e ndër konstitucionalistët tanë të shumtë e të spikatur! Pse? Se kanë frikë… Nga kush? Nga kryekallësi i frikës, natyrisht!

Në të njëjtën mënyrë veproi edhe prokurori Shtylla, i cili, edhe pse Berisha e quajti kriminel, doli të nesërmen dhe tha se Berisha është burrë i mirë, i drejtë, i ndershëm, se ai nuk ka faj… se faj kanë bashkëpunëtorët e tij, që e kanë keqinformuar!… Në këtë klimë frike, a dëgjuat të dilte në publik të nesërmen Presidenti i Republikës, kur ky u akuzua nga kryeministri se i ka dhënë medalje një prokurori kriminel? Jo! Edhe Topi heshti, natyrisht jo nga frika, se, Presidentët nuk kanë frikë, por ama nga… nga se heshti Topi vallë?... Gjeni një vend në rruzull, ku Presidenti i Republikës mund të mbyllë gojën kur sulmohet kësisoj nga kryeministri!? A dëgjoi njeri të dalë Prokurorja e Përgjithshme të mbrojë prokurorët e saj (dhe institucionin e saj!) që u bënë rezil, që u quajtën “vegla të opozitës”, kriminelë, vrasës, njerëz që kanë rrjepur, këputur krahë e koka nëpër tortura? Jo, se të gjithë e dijmë fort mirë: në Shqipërinë tonë demokratike tashmë është kallur frika! Doktori të bën gjëmën! Ai del papritur e pakujtuar në kamera dhe të shpall “kriminel të rrezikshëm” dhe ty, paskësaj, jo komshiu, po as gruaja nuk të beson dot…!

Pra, derisa trëmben kësisoj prokurorët dhe gjykatësit, Presidenti i Republikës, madje edhe e veja e dëshmorit të demokracisë, atëherë si të mos trembemi edhe ne qyqar-qytetarët?! Ky është “mandati” i vërtetë i ligjit!

Edhe pse Ligji në fjalë ka ngjallur aq shumë debate në publik, ku si rrallëherë, veç opozitës, janë përfshirë edhe ambasada amerikane, britanike dhe OSBE-ja, po këmbëngulet nga maxhoranca që ky Ligj të kalojë patjetër në Kuvend për miratim të hënën, pavarësisht nga mungesa e opozitës në sallë… Pra, Ligji i spiunëve do të zbatohet, ose jo në praktikë, këto natyrisht që kanë rëndësi, po hë për hë rëndësi ka pyetja: Përse Berisha është kaq këmbëngulës dhe përse ai nuk do t’ia dijë kësaj here as për ndërkombëtarët, as për ambasadën tonë të dashur amerikane, as për atë britanike dhe as për OSBE-në? Se, sa për opozitën dhe opinionin publik, ai as ka pyetur dhe as ka çarë ndonjëherë kryet!

Përgjigja është e thjeshtë. Berisha kësaj here është përnjëmend në hall. Në një hall të madh. Jo se kërkon të ruajë namuzin para shqiptarëve, meqë si burrë zakoni nuk mund të pranojë të tërhiqet, por se edhe vetë ai ka më shumë frikë se kurrë. Ka më shumë frikë edhe se prokurorët, se gjykatësit dhe natyrisht edhe se ne qytetarët. Edhe si ministrat e tij! Është një rregull i vjetër ky: kryekallësi i frikës kombëtare është njëkohësisht edhe një kryefrikës i papërmbajtur! Ndaj Berisha, po humbi kësaj here pushtetin, e di që do të jetë më i rrezikuar dhe më i pambrojtur se në vitin 1997, kur ndërkombëtarët kërkuan që ai të mos ndëshkohej, “që të shmangeshin përplasjet sociale”, që ikja e tij medemek të bëhej “sa më butë”…

Kurse sot, para akuzave për korrupsion, nuk ka “ambasadë amerikane” e as zyrë OSBE-je që mund ta mbrojë! Tani Berisha ka mbi krye një barrë tepër të rëndë: familjarët e vet dhe klanin e tij, mbi të cilët po bie barra e akuzave për miliarda euro të shpërdoruara e të përvetësuara, për toka dhe për pasuri të luajtshme e të paluajtshme… Ai ndihet përgjegjës për fatin e tyre të mëtutejmë. Si çdo baba sovran, kur ndjen se po i vjen fundi, ai instiktivisht hidhet në sulm total që të paralizojë kundërshtarët dhe të shmangë situatat e vështira që e presin… Natyrisht, e vetmja mundësi është të mbajë gjallë terrorin psikologjik, të kallë frikën te të gjithë, te kushdo që i del kundër e sidomos te organet e Drejtësisë!