DITA E TRIUMFIT për Haradinaj

-- nga Sabit Rrustemi

Kosova dhe përgjithësisht pjesa dërmuese e shqiptarëve presin me padurim që 3 Prilli të jetë Dita e Triumfit për ish kryeministrin e Kosovës dhe ish komandantin e UÇK-së për Zonën Operative të Dugagjinit, Ramush Haradinajn.
Dita e Triumfit ndaj një aktakuze shpifëse me të cilën u përball atdhetari, çliruesi, politikani, udhëheqësi institucional dhe lideri i AAK-së, Ramush Haradinaj në këto tri e sa vite, do të ishte shpërblimi më i madh për Kosovën e pas pavarësisë, për Republikën për të cilën flijoi shumë Ai, Familja e tij dhe përgjithësisht familja që tash identifikohet me shtetin më të ri në botë, Kosova.
Kjo Ditë Triumfi, do të ishte shpërblim më i merituar dhe më i pritur për shqiptarët kudo që janë nëpër botë, sepse do jetë Ditë e Triumfit të së vërtetës mbi gënjeshtrën, Ditë e Triumfit të së drejtës mbi të shtrembërën, Ditë e Triumfit të lirisë ndaj robërisë, po, edhe Ditë e Triumfit të synimit dhe arritjes së pavarësisë, si gjakim brezash nëpër kohë që nga Lidhja e Prizrenit e këndej.
Kjo Ditë, dhëntë zoti, të jetë edhe Ditë e Triumfit të drejtësisë kombëtare e ndërkombëtare, ndaj gjithë atyre që ishin antikombëtarë dhe antindërkombëtarë. Tre Prilli do jetë edhe Ditë e Triumfit për Gjykatën e Hagës, përmes së cilës do të dëshmohet edhe njëherë e drejta e një populli për çlirim dhe ngadhnjim ndaj një pushtuesi shekullor dhe shërbëtorëve të tij.

Triumfuesi Ramush
Dita e Triumfit ka një personazh kryesor, ka një Triumfues dhe ky, padyshim është Ramush Haradinaj.
Pas këtij Triumfuesi në këto tri vite përpjekjesh për të arritur deri te kjo Ditë, janë rreshtuar me mijëra e mijëra veta, me qindra mijëra, qoftë përmes marshimesh, qoftë përmes petiicionesh e nënshkrimesh, qoftë përmes solidarizimesh dhe mbledhje kontributesh, duke qenë të bindur se e drejta është në anën e Tij, të Ramushit dhe të këtij populli të përvuajtur që më në fund i shkrepi drita e lirisë dhe pavarësisë, mundësia për ta bërë përnjëmend shtetin.
Ramushi e meritoi epitetin e Triumfuesit edhe gjatë luftës, pavarësisht sfidave, pavarësisht përfoljeve, ndërskamcave, anatemimeve… pavarësisht peripetive dhe rreshtave të rralluar deri edhe në dhjeta gishta gjatë luftës për lirinë e Kosovës. Ai mbeti në Kosovë me ata që i qëndruan besnikë, mbeti më i fortë, pavarësisht numrit të luftëtarëve që e rrethonin. Mbeti triumfues sepse ishte fund e krye brenda Kosovës dhe kacafytej parreshtur me shpurën pushtuese serbe, edhe kur i numëronte fishekët e fundit, edhe kur i ndante me luftëtarë kafshatat e fundit të bukës, të shpresës.
Ai meriton këtë epitet në saje edhe të besimit të palëkundur se do të vinte dita e lirisë për Kosovën, njejtë sikur tash që do të vijë Dita e Lirisë për Ramushin.

Ai u bë Triumfues edhe pas luftës për lirinë e Kosovës, në ndërtimin e paqes, zhvillimit dhe arritjen e pavarësisë. Triumfues në ndërtimin e shtetit, duke hequr uniformën e zjarrëfikësi e duke e provuar un iformën e një paqebërësi. Dhe, pati sukses. Me sinqeritetin e tij dhe burrërinë e manifestuar si brenda ashtu edhe jashtë Kosovës, përkundër ndonjë emocionaliteti apo veprimi të nxituar, Ai krijoi hapësira mirëkuptimi, përafrimi dhe bashkëpunimi po, edhe pranimi, kudo, madje edhe në qarqet ndërkomëbatre, duke fituar edhe mbështetjen e mikut më të madh të shqiptarëve, amerikanëve.
Hyri ballëhapur në Kuvendin e Kosovës, ndikoi në arritjen fillimisht të një formule bashkëqeverisëse e, më pas u bë promotor i ndërtimit të përgjegjësisë institucionale, pozitë - opozitë, duke hyrë në të mirë të Kosovës dhe synimeve të saja në koalicion me ata kundër të cilëve vetëm çka nuk i kishin shkrepur pushkët.
Ishte qëllim madhor i Tij bërja e shtetit dhe Ai ia shtrinte dorën secilit, edhe pacifistit, edhe nacionalistit, edhe marksist -leninistit. Dëshironte që të gjithë t'i kishte në një rresht, nën një qëllim e, për një vision:Kosovën shtet Sovran e të pavarur.

Për tre muaj ishte shembulli më i mirë i udhëheqjes në Kosovën e pasluftës. I papërsëritshëm deri më sot. I pashembëllt edhe në çastin më vendimtar për karrierën e tij, në përcaktimin për t'u përballur me drejtësinë ndërkombëtare pa e dëmtuar interesin e Kosovës. Sepse për të ishte dhe mbeti: Kosova mbi të gjitha.
Akti i shkuarjes vullnetare në Hagë nga pozita e një kryeministri me porosinë madhore se mbi të gjitha është interesi i Kosovës, bëri që ai moment kritik të përballohet denjësisht.
Bota mbeti pa tekst dhe gjithë dashakeqet e Kosovës e të Ramushit. Madje edhe shpifësit e tij. Edhe fabrikuesit e aktakuzës së tij, udbashët e Serbisë. Beogradi zyrtar.

Pa tekst mbeti edhe akuzuesja e Tribunalit të Hagës, Prokuroria e cila u "dorëzua" para maturisë së tij dhe të një populli e, që ishte meritë e Ramushit dhe, para se gjithash një Triumf i Ri nga ana e tij.
Ndërkombëtarët dhe, ata që po punojnë për një shoqëri demokratike dhe për një Kosovë stabile, nga të gjitha sferat, e çmuan këtë akt të Ramushit, e çmuan këtë sjellje dinjitoze të këtij populli duke e shpaguar me mirëkuptim, edhe për Ramushin, për familjen e tij po, edhe për Kosovën.

Tash, radha dhe pritja është për Trimfin më të i të Ramushit, lirimin nga akuzat shpifëse të Hagës, të konstruktuara nga regjimi millosheviqëian e Beogradit dhe pasuesve të tij dhe, kthimi i Tij në detyrë, në ngritjen, zhvillimin dhe përsosjen e këtij shteti të ri, në tejkalimin e kësaj brishtësie momentale dhe, sforcimin e tij.
Ramushi, e ka vullnetin, fuqinë, mbështetjen po, mbi të gjitha, e ka guximin për ta bërë atë që po e prêt ky popull: funksionalizimin e shtetit të Kosovës dhe identiifikimin e këtij shteti me të Zotin e Shtëpisë, me miqtë e kësaj shtëpie. Tre Prilli do të jetë Dita e Vendimit për Triumfin më të ri të një çliruesi, ndërtuesi dhe vizionari. Do jetë dhe dhurata më e mirë për këtë popull por, edhe për ditëlindjen time.
Mirë se vjen me emblemën e triumfuesit, Ramush Haradinaj. Kosova të mirëpret. Si nana birin e saj.